«Digital Bridge – 2023» halyqaralyq forýmyna kelip, Qazaqstan týraly oıym ózgerdi. Bul eldiń sıfrly álemnen oıyp turyp oryn alyp jatqanyn túsindim.
Muny osy úlken halyqaralyq jıynda Qazaqstan Prezıdenti Qasym-Jomart Toqaevtyń sóılegen sózinen de anyq ańǵardym. Al osy jınalysqa keler aldynda «Astana Hub» tehnologııalar parkinde maǵan erekshe shabyt bergen adamdarǵa jolyqtym. Olar maǵan óte jaqsy áser qaldyrdy. Tamasha múmkindik pen berik senimdi kórgende jaqsylyqqa degen úmitim ulǵaıdy. Biz Qazaqstannyń damýyna úles qosqan ınnovatorlarmen tanystyq, olardyń jumysyn baqyladyq. Qazaqstan týraly oılarym ózgerip, ózime óte qyzyqty tájirıbe jınaǵandaı boldym. Bul eldiń áleýeti zor ekenine kózim jetti. Adamdary bilimdi ári erekshe yntaly eken. Shynynda da, bul memleket Ortalyq Azııadaǵy tehnologııalyq habqa aınalýy múmkin.
Alty jyl buryn Qazaqstanda sıfrlyq sheshimder engiziletinin estidim. Qazir bul elde Kaspi qoldanbasy bar, ony barlyǵy paıdalanady. Estýimshe, munda kóp adam qolma-qol aqshany da qoldanbaıdy. Bul – sıfrlyq jetistik. Shyny kerek, Qazaqstan dál osy turǵydan alǵanda AQSh-tan áldeqaıda ozyq tur. Mysaly, AQSh-ta «Starbucks»-qa kelip, kofeniń aqshasyn tóleýge qanshama adamnyń tıyn sanap turǵanyn kóresiz. Al Qazaqstandaǵy mundaı jetistikter erekshe qubylys ári ol qoǵamǵa úlken áser etedi.
Men jasandy ıntellekt ómirimizdi jaqsartatynyna 100 paıyz senimdimin. Sondyqtan barlyǵy jasandy ıntellektige ınvestısııa salýy kerek. Mysaly, men bıtkoındi jaqsy kóremin. О́ıtkeni ol ortalyqtandyrylmaǵan. Bıtkoınniń bolashaǵy zor. Ony damyǵan memleketter qushaq jaıa qabyldady.
Keıingi ýaqytta Qazaqstannan erekshe startaptar shyǵyp jatyr. Bul – qýantarlyq jaǵdaı. Startaptar ekonomıkany damytýǵa, jumys oryndaryn qurýǵa ári ómirdi jaqsartýǵa kómektesedi. Bul eldiń dál osyndaı kózqarasta bolǵany kópke úlgi.
Tım DREIPER,
venchýrlyq ınvestor, «Draper Fisher Jurvetson» kompanııasynyń teń quryltaıshysy,
Dreıper ýnıversıtetiniń negizin qalaýshy