«SpaceX» kompanııasy birneshe jyl buryn «Starlink» ǵalamdyq spýtnıktik júıesin damyta bastaǵany belgili. Bul jelisi nashar, qymbat nemese múldem qoljetimsiz jerlerde spýtnıktiń kómegimen joǵary jyldamdyqty keń jolaqty ınternetke qoljetimdilikti qamtamasyz etýge arnalǵan. «Starlink» alǵashqy lısenzııasyn alǵannan keıin bes jyldan keıin bes myńnan astam jerserik ushyryldy.
2022 jylǵy derekke súıensek, adamzattyń úshten biri áli de bolsa ınternetke qosylmaǵan, azamattardyń kóbinde tek negizgi ınternet baılanysy ǵana bar. «Starlink» osy dúnıelerdi jaqsartýǵa múmkindik beredi. Jalpy, baılanys degenimiz – óte kúrdeli másele. Buǵan qosylý múmkindigi nemese ınfraqurylymnyń bolýy azdyq etedi. Bul jerde tehnologııalardyń qarjylyq qoljetimdiligi, tehnologııalardy paıdalaný múmkindigi de mańyzdy. Ásirese sońǵysyna basymdyq bergen abzal.
Biz usynyp otyrǵan «Starlink»-ti ornatý ońaı. Ony qoraptan shyǵaryp, kókke baǵyttap, ınternetke qosylasyz. Boldy. Qurylǵylardyń bári bir qorappen keledi. Qurylǵy dep otyrǵanym – qarapaıym «Starlink» jıyntyǵy. Oǵan Wi-Fi modemi jáne rozetka symy kiredi. Negizi mundaı kidirisi az keń jolaqty qoljetimdilikti alý úshin úlken jabdyq, ony ornalastyrý úshin uzaq ýaqyt qajet. Al «Starlink»-ti rıýkzakqa salyp, kólikpen alyp júrýge bolady. Qysqasy, óte tıimdi.
Aıtpaǵym, «Starlink» Qazaqstannyń eldi mekenderin ınternetpen qamtamasyz etýde tıimdi qadam bola alady. Bul shalǵaıdaǵy aýyldar betpe-bet kelip otyrǵan baılanys máselesin oıdaǵydaı sheshýge jol ashar edi. Biz telekommýnıkasııa jáne IT-ınfraqurylym salasyndaǵy basqa da baǵaly bastamalardy baıyta túser edik.
«Starlink»-tiń kommersııalyq satylymy AQSh-ta shamamen úsh jyl buryn bastaldy. Qazir barlyq jeti qurlyqtaǵy 60 elde 2 mıllıonnan astam klıent bar. Al naqty paıdalanýshylar sany 10 mıllıonnan asty. Bul qatarda Qazaqstan turǵyndary da bolsa tamasha emes pe?
Loren DREIER,
«SpaceX» kompanııasynyń «Starlink» máseleleri jónindegi vıse-prezıdenti