Mańǵystaýdyń mań dalasynyń sánin keltiretin ańdardyń biri – arqar. Pir Bekettiń asyraýynda bolǵan túlik sanalatyndyqtan óńir turǵyndarynyń uǵymynda arqarǵa degen qurmet aıryqsha. Bir jyldary ártúrli sebeppen sany azaıǵan arqardyń basy qazir qaıta kóbeıip keledi.
Qazannyń mamyrajaı bir aptalyǵynda taý men tasty meken etken arqarlarǵa sanaq júrgizildi. Naqtyraq aıtsaq, barlyq erekshe qorǵalatyn tabıǵı aýmaqtarda «Ohotzooprom» О́B RMQK jáne Zoologııalyq ınstıtýtynyń qyzmetkerleri tarapynan josparǵa sáıkes sanaq jumystary júrdi. Sanaq nátıjesinde Qyzyl kitapqa engen, joıylý qaýpi bar tuıaqty jabaıy ańdardyń, sonyń ishinde arqar sanynyń óskeni baıqaldy. Sońǵy úsh jyl boıynsha ósim sany 18%-dy quraıdy. 2021 jyly arqarlar sany 861, 2022 jyly 1026 bolsa, 2023 jyly 1059 basqa artqan.
Mańǵystaý oblysy aýmaǵynda 1 óńirlik tabıǵı «Qyzylsaı» parki, «Jabaıushqan», «Manashy», «Tasorpa», «Adamtas» syndy óńirlik tabıǵı qaýmaldar bar. Qaýmal qyzmetkerleriniń eńbegi nátıjesinde 2023 jyly qaýmal aýmaqtary boıynsha 42 bulaq kózi ashyldy. Qoldan sýarý ádisimen qudyq basyna astaý ornatylyp, syrty qorshaldy. Reıdtik sharalar úzdiksiz júrgizilip, órt qaýipsizdigi boıynsha baqylaý kúsheıtildi.
Arqar sanynyń artýy dala ańdarynyń qaýipsizdigin qamtamasyz etý baǵytyndaǵy jumystardyń jemisi deýge negiz bar.
Mańǵystaý oblysy