Qazaqstannyń Halyq ártisi ataǵy qaıta oralatynyn jáne bul marapatty alǵash ıelenetinderdiń qatarynda ózimniń bolatynymdy maǵan Qasym-Jomart Kemelulynyń ózi ushaqta birge kele jatqanymyzda aıtqan bolatyn. Árıne, estigende óte qatty qýandym.
Bul qurmetti ózimniń azdy-kóp jasap jatqan eńbegimniń baǵalanǵany jáne halyq tarapynan kórsetilgen qoldaý retinde qabyldaımyn. Degenmen biz sekildi óner adamdary úshin eń basty baılyq – ol halyqtyń yqylasy men mahabbaty. Eldiń qurmet-qoshemetin eshbir marapatpen almastyra almaıdy. Búgingi alǵan ataǵyma laıyqpyn ba, joq pa, ony da halyq aıtady. Múmkindiginshe osy bıikten kórinýge, halyq ártisi degen atqa saı bolýǵa tyrysyp, ónerimdi baǵalaıtyn jurtshylyqty jaqsy ánderimizben qýanta beremiz.
Áý bastan meniń árbir aıaq alysymdy qoldap-qýattap kele jatqan halqyma jáne búgin Aqordanyń tórinde óz qolynan marapatty tapsyrǵan Prezıdentke basymdy ıip rahmet aıtamyn. Eń bastysy, elimiz aman, jurtymyz tynysh bolsyn!
Dımash QUDAIBERGEN,
Qazaqstannyń Halyq ártisi, ánshi