Aqtóbede sot eks-depýtat Sánııa Muratovaǵa mas kúıinde kólik júrgizgeni úshin úkim shyǵardy, dep habarlaıdy Egemen.kz.
5 qyrkúıek kúni tártip saqshylary Báısheva kóshesiniń boıynda 53 jastaǵy áıeldiń basqarýyndaǵy «Leksýs» kóligin toqtatqan. Qujattardy tekserý kezinde júrgizýshiden alkogoldiń ıisi shyqqan.
Ákimshilik quqyq buzýshylyq isteri jónindegi mamandandyrylǵan aýdanaralyq sotynyń baspasóz qyzmeti medısınalyq saraptama jeńil dárejedegi mas kúıin kórsetkenin málimdedi. Sot Muratovany kináli dep taýyp, 15 táýlikke qamaýǵa alý týraly sheshim shyǵardy. Ol sonymen qatar jeti jylǵa júrgizýshi kýáliginen aıyrylady.
Sot úkimi zańdy kúshine engen joq.
Sánııa Muratova máslıhattyń áleýmettik-mádenı damý jáne jastar isi jónindegi turaqty komıssııasynyń múshesi boldy. Osy oqıǵadan soń ol depýtattyqtan ketý týraly aryz jazdy.
Muratovanyń jeke fıtnes ortalyǵy bar.