Qostanaıda taǵy bir kópqabatty turǵyn úı paıdalanýǵa berildi. Respýblıka kúni merekesi qarsańynda «Iýbıleınyı» shaǵyn aýdanyndaǵy toǵyz qabat eńseli úıge baspana kezeginde turǵan kópbalaly otbasylar, múmkindigi shekteýli jandar, kámeletke tolǵan jetim balalar men zeınetkerler qonystandy. Qonystanýshylardy oblys ákimi Qumar Aqsaqalov arnaıy kelip quttyqtap, ár otbasyna páter kiltin tabys etti.
– «Baspana – baqyttyń kilti» degen sózdi halqymyz beker aıtpaǵan. Kez kelgen adamnyń, kez kelgen otbasynyń úlken armany osylaı sizder sekildi baspanaly bolý emes pe? Minekı, búgin ulttyq mereke – Respýblıka kúni qarsańynda sol qýanyshqa ıe bolyp jatyrsyzdar. Qutty bolsyn! Bıyl Qostanaı qalasynda 33 kópqabatty úı turǵyzyldy. Al aldaǵy 5 jylda 2,5 mln sharshy metr turǵyn úı salýdy josparlap otyrmyz. Demek taǵy 80 myń adam baspanaly bolady degen sóz, – dedi aımaq basshysy.
Baspana qýanyshyna ıe bolǵandardyń ishinde kópbalaly ana Lázzat Qapabaeva da bar. Bes bala tárbıelep otyrǵan ananyń tuńǵyshy – 22-de, kenjesi 4 jasta eken. 4 jyl boıy páter jaldap turý ońaıǵa soqpapty.
– О́zimiz osydan tórt jyl buryn Uzynkól aýdanynan kóship keldik. Sodan beri árkimniń bosaǵasyn panalap júrdik. Kóp balamen páter jaldap turý qazir óte qıyn. Endi mine, sonyń bári artta qalyp, óz páterimizge qol jetkizgenimizge, shynymdy aıtsam, áli de sene almaı turmyn. Bir jaqsy tanysymyz kópbalaly ana retinde kezekke tursań, memleket páter beredi degen soń, oblystyq ákimdikke baryp, keńesten ótip, qujattarymyzdy jınap ótkizdik. Kóp keshikpeı, mine, búgin kezek kelip, páterdiń kiltin aldyq. О́zim de, balalarym da qýanyp jatyrmyz, – deıdi L.Qapabaeva.
«Nurly jer» baǵdarlamasy boıynsha Qostanaıda osymen úshinshi kópqabatty turǵyn úı jalǵa berildi. Barlyǵy – 273 páter. Jyl aıaǵyna qaraı «Áýejaı» shaǵyn aýdanynda taǵy bir 9 qabatty úı paıdalanýǵa berilmek.
Qalalyq turǵyn úı qatynastary bólimi basshysynyń mindetin atqarýshy Ǵabıt Bektabanovtyń aıtýynsha, bıyl qalalyq qurylys basqarmasy áleýmettik qoldaýǵa muqtaj otbasylarǵa arnap 40 páter satyp alady. Onyń bári aldymen turǵyn úı bóliminiń balansyna beriledi. Sodan keıin kezekte turǵandarǵa taratylady.
Qostanaı oblysy