Tálimger

Jumystan kesh qaıtqan. Kóz baılanyp, juldyz jamyraǵan ýaqyt. Býrabaı aspany qara barqyttyń ústine bir ýys jarqyraǵan monshaq shashyp jibergendeı sáýlesimen kóńil arbap tur. Jańa týǵan aı Oqjetpestiń oń jaq ıyǵyna ilinip qalypty. Qundyzbek Nuqyshevke jer-álemdegi eń ádemi aspan osy Býrabaıdyń aspany tárizdi bolyp kórinedi. О́zi týǵan qart Semeıdiń, Alashqa qadirli Semeıdiń aspany da ádemi edi. «Juldyzym joǵary» dep kúbirledi Qundyzbek. Juldyzynyń joǵary ekeni de ras. Joǵarylasa, bilmekke qumar talpynysynan, erinbeı etken eńbeginen. «RG Gold» seriktestiginiń úımelep-shaımalaý ýchastoginiń sheberi Qundyzbek Qajybekuly eńbek álippesin qarapaıym jumysshy bolyp bastaǵan. 1999-2005 jyldar aralyǵynda kátepti qara nardaı eńbek etti. Eńbek elenbeı qalmaq emes. Tyndyrymdy jigittiń aldynan jumys úrkip otyratynyn basshylar da, úzeńgi qaǵystyryp birge júrgen uıymshyl ujym da kórdi. Áriptesterin ortaq iske jumyldyra alady eken. Sózben ǵana emes, óz isimen, áreketimen, jalyǵýdy bilmes jalynymen. Keıin brıgadırlikke taǵaıyndalǵan. Ortaq isti opyryp, nátıjeli isteýiniń arqasynda Qundyzbektiń brıgadasy kúndelikti jospardy tap-tuınaqtaı etip oryndaıtyn boldy.

Semeıdegi kásiptik-tehnıkalyq kolledjden alǵan bilimin jalǵastyrǵan. О́z mamandyǵyna baılanysty tehnıkalyq ádebıetterdi, álemdegi jańalyqtardy qadaǵalap júredi. Onsyz ósý joq. Jalǵyz ózi ǵana emes, ókshesin basqan órender de bilse, úırense degen tilek bar. Jastarǵa bar bilgenin úıretýden jalyqqan jeri joq. Eger olardyń boıynda qumarlyq oty laýlap tursa, jaratqan ıeniń jarylqaǵany deı berińiz. Jetegine ergen jandy qos qoltyǵynan demep, alǵa umtyldyrýǵa qumar. Osyndaı yjdahattylyǵynyń arqasynda Qýanysh Raqymbaev, Hamza Edige, Aıdyn Tólepbergenov tárizdi azamattar uıymshyl ujymnyń, Qundyzbek Qajybekulynyń tálim-tárbıesinen keıin uıasynan túlep ushqan temirqanat balapandaı bıikti ańsaı ushyp, brıgadır, sheber bolyp ketti emes pe?! Tálimger eńbeginiń zaıa ketpegenine qýanady. Qazaq jas­tary tehnıkalyq mamandyqty meńgerip, qaýlap ósip, jetilse, jaqsy emes pe?

– Qazaq balasynyń mańdaıyna mal baǵýdy ǵana jazyp qoıǵan joq shyǵar. Jatpaı-turmaı órkenıet órine shyǵaratyn kez kelgen kásipti qapysyz meńgerse, kánekı? Bizdiń jastardyń qabileti ábden jetedi. Kózimizben kórip júrmiz. Bir aıtqanyńdy qaǵyp alatyn qabiletti, qaı iske bolsyn ıkemdi jastardy kórgende kóńilim búrlep qalady, – deıdi Qundyzbek Qajybekuly.

Býrabaıdyń baýraıy qazynaǵa tunyp tur. Ústi de, asty da. El ıgiligine jaratý úshin eńbek ete bilý kerek. Bizdiń keıipkerimiz dál osylaı paıymdaıdy. Altyn óndiretin «RG Gold» seriktestiginiń osy ýchaskesinde jumys qaýyrt, qaınap jatady. Taý jynysynan quramynda altyny bar kendi aıyryp alý da ońaı-ospaq sharýa emes. Jaryqtyq altyn at basyndaı bolyp kezikpeıdi ǵoı. Qazaqy uǵymmen aıtqanda, bir maıa shóptiń ishinen jazataıym joǵalǵan jalǵyz ıneni izdegendeı qııapat eńbek. Bul tusta jumysshynyń boıyndaǵy jalyǵýdy bilmes eńbekqorlyq qana emes, bilim men bilik te talap etiledi. Sondyqtan ǵoı sanqıly ǵylymı eńbekterdi oqyp, bilimin jetildiretini. Asylynda Qundyzbek Qajybekuly – Qazaqstanda altyn kenin úımelep-shaımalaý ádisin engizgen sanaýly sheberdiń biri. Jalǵyz osy seriktestikte ǵana emes, altyn óndiretin ózge kenishterde de osy ádistiń qoldanylýyna septigin tıgizgen. Sheteldik mamandardyń ozyq tájirıbesin ilkimdi ıgere otyryp, bilim men eńbekti ushtastyra damytyp jatyr. Osy kompanııada 2015 jyldan beri taban aýdarmaı eńbek etip keledi. Bir jaqsysy, joǵary kásibı daǵdylarǵa ıe jáne óz bilimin únemi jeteldirip otyrady. Eńbegi laıyqty baǵalanyp, marapattarǵa ıe boldy. Úzdik tálimger atandy. Is-tájirıbesin baıyptap, tarazy basyna tartqan baıqaýlarda top jardy.

Tálimger de qutty baǵban ispetti. Máselen, baǵban qara jerdiń tósine kóshet ekse, qashan sonyń japyraq jaıyp, jemis bergenin et júregi eljirep tosady emes pe? О́zi tárbıelegen jastardyń qaýlap ósip kele jatqanyn kórip, kóńili marqaıady. Demek, jalyndy jastardyń tárbıesinen jan aıamas jigerli jan eńbeginiń jemisin kórip otyr degen sóz.

Aqmola oblysy,

Býrabaı aýdany