Egemen elimizdiń mereıli merekesi – Respýblıka kúni Almaty oblysynda da aıryqsha ataldy. Armany Alataýdaı asqaq, keleshegi kemel óńir jurtshylyǵy ulttyq merekege tolaǵaı tabys, jarqyn kóńil kúımen keldi. Bıik taýdyń baýraıynda án qalyqtap, kúı kúmbirledi. Kók Týymyz kókte jelbiredi. Qonaev qalasynyń Mádenıet úıinde ótken saltanatty shara oblys ákimi Marat Sultanǵazıevtiń aqjarma tilegimen bastaldy. Jeri shuraıly óńirdiń áleýmettik-ekonomıkalyq damýy beınerolık arqyly baıandaldy.
«Tatýlyqty tý etken elimizdiń baǵyndyrǵan belesteri, alǵan asýlary kóp. Búginde Qazaqstan – eńsesi bıik, ekonomıkasy órlegen, áleýeti artqan zamanaýı memleket», degen oblys ákimi byltyrdan beri qaıta túlegen óńirdiń el qýatyn eseleýdegi orny erekshe ekendigine toqtaldy.
– Almaty oblysy elimizdiń qýatyn arttyrýda erekshe oryn alady. Otandyq ekonomıkalyq zertteýler ınstıtýty bizdiń bastamamyzǵa sáıkes Almaty oblysynyń 2030 jylǵa deıingi damý strategııasyn ázirledi. Qonaev qalasynyń Bas jospary bıyl bekitildi, al kelesi jyly oblys ortalyǵynyń «Jańa Ile» alańynda qurylys jumystary bastalady. Onda akademııalyq qalashyq, teatr, murajaı, kitaphana, kópsalaly klınıkalyq aýrýhana, sport kesheni, shyǵarmashylyq ortalyq, temirjol vokzaly, Botanıkalyq baq jáne abattandyrylǵan jaǵalaý salynady. Qonaev qalasynyń aýmaǵy da belsendi damyp keledi. «G4 City» jobasynyń iske asýy ony jańa deńgeıge kóterdi.
Ulttyq merekede eńseli elimizdiń qut-berekesin tasytyp, yntymaq-birligin jarastyryp júrgen eńbek ardagerleri, aqsaqaldar alqasynyń músheleri men túrli baǵytta qyzmet etetin mamandar marapattaldy.
Atap aıtsaq, «Parasat» ordenimen oblystyq ardagerler keńesiniń tóraǵasy Erbolat Turymbetov pen «Aqterek» sharýa qojalyǵynyń basshysy Temirlan Shaınúsipov marapattaldy. Sonymen qatar Uıǵyr aýdanynyń eńbek ardageri Abdımanap Amıtahýnov, Raıymbek aýdandyq ardagerler men aqsaqaldar alqasynyń tóraǵasy Bekbolat Birbaev, Eńbekshiqazaq aýdanynyń eńbek ardageri Meırash Nuraqanqyzy, Talǵar aýdandyq aýrýhanasy bas dárigeriniń orynbasary Tımýr Aqmyrzauly jáne «Kelun-Kazpharm» JShS bas dırektory Mereı Slamuly «Qurmet» ordeniniń ıegerleri atandy. О́ńirdiń órkendeýine eleýli úles qosqan birqatar mamandarǵa «Eńbek dańqy» ordeni, «Erligi úshin», «Eren eńbegi úshin», «Shapaǵat» medalderi jáne Qazaqstan Respýblıkasynyń Qurmet gramotasy tabystaldy.
Qýanysh eselengen osy kúni Súıinbaı atyndaǵy oblystyq fılarmonııaǵa óńir basshysy Marat Sultanǵazıev 51 oryndyq avtobýstyń kiltin saltanatty túrde tabys etti.
«Almaty oblysy ákimdiginiń qoldaýymen qarjy bólinip, búgin avtobýsqa ıe boldyq. О́te qýanyshtymyz. Endi ujymnyń jan-jaqqa issaparǵa barýy jeńildeıdi. Mereke qutty bolsyn, barsha jurtqa tek jaqsylyq tileımin», dedi fılarmonııa basshysy Danııar Quramysov.
Eseli eńbekteri elengen eńbek adamdarynyń qýanyshtarynda shek bolmady.
«Búgin meniń ǵana emes, bizdiń aýyldyń, aýdanymyzdyń eńbegi baǵalanyp jatyr. Oǵan Memleket basshysynyń ózi uıytqy boldy. 40 jyl boıy aýyl sharýashylyǵy salasynda qyzmet etip kelemin. Osy jyldarda halyqtyń ál-aýqatyn arttyrý jolynda aıanyp qalǵan kezimiz joq. Jumysshylarǵa 150-ge jýyq úı salyp berdik. Qazaqstan ekonomıkasynyń damýyna kishkentaı bolsa da úles qostyq dep sanaımyz. Búgingi marapat – sonyń bir belgisi», dep aǵynan jarylǵan «Parasat» ordeniniń ıegeri Temirlan Shaınúsipov aspanymyz ashyq, zamanymyz tynysh bolýyna tilektestigin bildirdi.
Respýblıka kúnine oraı, Almaty oblysy memlekettik kirister departamentiniń jańa ǵımaraty paıdalanýǵa berildi. Atalǵan ǵımarat Qonaev qalasyna kireberis tusta ornalasqan. Bul nysan buryndary oıynhana bolǵan.
Sizder jańa qurylǵan oblysymyzdyń barlyq qyzmetshileri sııaqty kóship-qonýdyń qıyndyǵyn da, ózindik qyzyǵyn da kórdińizder. Biraq eshqandaı kedergige qaramastan, aıanbaı eńbek etip kelesizder. Jańa ǵımaratta el bolashaǵyn jarqyn eter jobalar iske asa bersin, ulttyq mereke qutty bolsyn!», dedi oblys ákimi Marat Eleýsizuly.
Al departament basshysy birtindep olqylyqtar ońalyp kele jatqanyn alǵa tartty.
«Aıtýly merekege oraı qýanyshqa keneldik. Osyǵan deıin biz 3 jerde bólinip otyrdyq. Bul ǵımaratty oblys basshylyǵynyń qoldaýymen satyp aldyq. Nysandy jóndeýden ótkizdik. Munda 196 adam qyzmet etýge tıis. Bastapqyda salyqtar boıynsha barlyq jumysty 86 maman ǵana júrgizdi. Búginde shtat sany 160-qa jetti. Áli de bilikti mamandar qajet, baıqaý jarııalanýda», degen departament basshysy Qulmuhanbet Isaqov eńseli ǵımaratta jumys jandana túsetindigine ýáde etti.
Eldigimizdi asqaqtatqan Respýblıka kúni Qarasaı aýdanyndaǵy Súleımen Demırel atyndaǵy ýnıversıtettiń sport jáne mádenıet kesheni qoldanysqa berildi.
Keshenniń jalpy aýmaǵy – 4 370 sharshy metr. Onyń ishinde 1 400 sharshy metrlik sport zaly ornalasqan. Nysanda uldar men qyzdarǵa arnalǵan 2 fıtnes ortalyǵy bar. Sondaı-aq munda ártúrli mádenı is-sharalarǵa arnalǵan alańdar, akt zaly ornalasqan. Jalpy, ýnıversıtette 28 stýdenttik klýb sporttyq, shyǵarmashylyq jáne mádenı bastamalardy júzege asyrýda. Keshen zamanaýı kerek-jaraqtarmen jabdyqtalǵan.
Ǵımarattyń ashylý saltanatyna oblys ákimi Marat Sultanǵazıev arnaıy qatysyp, ujymdy merekemen quttyqtady. Ol óz sózinde óńir úshin maman daıarlaýda SDÝ-diń róli mańyzdy ekenin aıryqsha atady.
Súleımen Demırel atyndaǵy ýnıversıtettiń sport jáne mádenıet kesheniniń alqyzyl lentasy qıylǵan soń oblystaǵy 200 mektep dırektorlarynyń qatysýymen semınar-trenıng ótkizildi. Bul shara oqý oshaqtaryndaǵy, pedagogıka salasyndaǵy túıtkildi máselelerdi talqylaý úshin arnaıy uıymdastyrylǵan.
Almaty oblysy