Baspanaly bolý – bul da bir úlken baqyt. Al sol ańsaǵan shańyraǵyńnyń kiltin dál Respýblıka kúninde alý – áser ústine áser ústemeleıtindeı. Nege deseńiz, ultymyz úshin qasterli meıramda qutty qonysqa qol jetkizý kóńilińdi odan beter asqaqtata túseri anyq. Osy sátti kúni keshe jetisýlyqtar bastan keshti. Eń ǵajaby, bul ıgilikti iske tek memleket qana emes, atymtaı azamattar da atsalysqan. Shattyqqa toly sharanyń biz de kýágeri boldyq.
Jalpy, Jetisýda mereke saıyn baspana kiltin tapsyrý is-sharasy jıi ótip turady. Bıyl óńirde 2 myńǵa jýyq turǵyn páterli bolýǵa nıetti. Jyl sońyna deıin áli talaı turǵyn qonystoıyn toılaıtyn bolady. Al keshegi mereıli merekede kezekte turǵan 110 otbasy kópten kútken baspanalaryna qol jetkizdi. Naqtylap aıtsaq, demeýshiniń qarjysyna salynǵan kópqabatty úıdiń jańa páterlerine taldyqorǵandyq 60 otbasy ıe boldy. Al Aqsý aýdanynda 50 páterlik úı paıdalanýǵa berildi. О́ńir ákiminiń baspasóz qyzmetiniń málimetinshe, onyń qurylysyna bıýdjetten 855 mln teńgeden asa qarjy bólingen.
Taldyqorǵan qalasyndaǵy demeýshi kompanııanyń qarajatyna turǵyzylǵan 60 páterli 5 qabatty jańa úı «Hareket» qaıyrymdylyq qory arqyly turǵyn úı kezeginde turǵan áleýmettik osal sanattaǵy azamattarǵa berildi. Olardyń qatarynda tolyq emes jáne kópbalaly otbasylar, múgedektigi bar adamdar, erekshe qajettiligi bar balalardy tárbıelep otyrǵan otbasylar, turmysy aýyr otbasylar bar. Bul úıde 3 bólmeli – 30 jáne 2 bólmeli 15 páter bar.
Jańa qonys ıelerin Respýblıka kúnimen quttyqtaǵan oblys ákimi Beıbit Isabaev bıyl óńirde 2000-ǵa jýyq otbasy jańa páterge ıe bolatynyn, solardyń birqatary búgin baspanasyna kiretinin atap ótti. Qurylystyń osyndaı qarqynyn saqtaı otyryp, 3-4 jyl ishinde oblys ortalyǵyndaǵy kezekti 50%-ǵa qysqartýǵa bolatynyn aıtty:
«Sońǵy jyldary Taldyqorǵanda páter máselesi ózekti boldy. Biz qalyptasqan jaǵdaıdy jaqsartý úshin tıisti sharalardy qabyldadyq. О́kinishke qaraı, memlekettik qordan beriletin turǵyn úı kezeginde 15-20 jyl boıy turý – tek bizdiń oblysta ǵana oryn alyp otyrǵan jaıt emes. Bul – bizdiń kinámiz, ol úshin keshirim suraımyn. Endi elektrondyq kezekti engizýdiń arqasynda biz ádildik pen ashyqtyq qaǵıdatyn qatań saqtaı otyryp, páter bólýdiń ashyqtyǵyn qamtamasyz ettik. Bul týraly Prezıdent únemi aıtyp keledi. Al búgin merekede qabyldanyp jatqan sharalardyń arqasynda halyqtyń áleýmettik osal toptarynyń ishinen taldyqorǵandyq 60 otbasy demeýshi kompanııa men qaıyrymdylyq qordyń qoldaýymen qonystoı qýanyshyna kenelip otyr. Jyl basynda mesenattardyń kómegimen bir 60 páterli úıdi qoldanysqa berdik, búgin taǵy bireýin, eki aptadan keıin 60 páterlik taǵy bireýin paıdalanýǵa berýdi josparlap otyrmyz. Osylaısha, ómirlik qıyn jaǵdaıǵa tap bolǵan halyqtyń áleýmettik osal toptarynan kezekte turǵan 180 azamat kópten kútken baspanalaryna demeýshilerdiń qoldaýynyń arqasynda tegin qol jetkizdi. Úıdi salǵan demeýshi kompanııa – «Eurotranzit Terminal» jaýapkershiligi shekteýli seriktestigine jáne «Hareket» qaıyrymdylyq qorynyń ókilderine alǵysymdy bildiremin. Barshańyzdy Respýblıka kúnimen jáne qonystoılaryńyzben taǵy da quttyqtaımyn! Shańyraqtaryńyz shattyqqa tolsyn!», dedi B.Isabaev.
Oblys basshysy jańa úıdiń janynda balalar alańyn ornalastyrýǵa arnalǵan oryn bar ekeni, ony kelesi jyly salý josparlanyp otyrǵanyn da tilge tıek etti.
«Eurotranzit Terminal» JShS dırektorynyń orynbasary Sergeı Gordıenko turǵyndarǵa quttyqtaý tilegin bildirdi: «Bizdiń kompanııa áleýmettik mańyzdy jobalarǵa únemi qatysady. Taldyqorǵan qalasynyń ákimdigimen jasalǵan memorandýmǵa sáıkes 60 páterlik úı salyp, bul úı búgin kezekte turǵandarǵa tegin berilip otyr. Turǵyn úı degen – jaı ǵana qabyrǵadan, tóbeden, shatyrdan turatyn ǵımarat emes, bul – kómekke muqtaj otbasylar úshin úmit shyraǵy, qutty qonys», dedi ol.
Qor ókilderiniń atynan onyń quryltaıshylarynyń biri Madııar Serikbaev sóz aldy. Qordyń jumysyna toqtalǵan ol 6 jyl ishinde Qor muqtaj jandarǵa 1 000-nan asa páter bergenin aıtty: «Qýanyshymdy sózben aıtyp jetkize almaımyn. Búgin taǵy 60 otbasynyń sheksiz qýanyshyna kýá bolyp otyrmyz. Jetisý oblysynda bizdiń qoldaýymyzben osy alpys otbasyn qosqanda barlyǵy 182 otbasy jańa qonysqa kirdi», dedi ol.
Baspanaǵa qol jetkizgenderdiń biri – jeti bala tárbıelep otyrǵan Álııa Tazabekova. Ol osydan 12 jyl buryn turǵyn úı kezegine turǵan:
«Búgin merekede úsh bólmeli páterdiń kiltterin qolyma aldym. Bul – bizdiń úlken otbasymyz úshin eń baqytty kúnderdiń biri. Úlken qyzym – 18 jasta, kenje ulym – nebári 5 aılyq. Úılengenimizge 20 jyl boldy. О́zimniń mamandyǵym – aspaz. Kúıeýim jumys isteıdi. Úı satyp alýǵa múmkindigimiz joq. Jaldamaly páterdiń birinen-birine kóship júrýden sharshadyq, ári qıyn, ári qymbat. Búgin kópten kútken qýanyshty sátimiz týdy. Shyn júrekten rızamyz», deıdi jańa qonys ıesi.
Taǵy bir turǵyn rızashylyq keıippen izgi tilegin bildirdi: «11 jyl kezekte turdyq. Ulym men kelinim jol apatynan qaza tapty. Olardyń qyzy, nemerem Aıandy ózim tárbıeledim. Onyń birinshi top múgedektigi bar, óte qıyn, oǵan turaqty kútim kerek. Qazir onyń jeke páteri bar. Endi ekeýmizge de áldeqaıda jeńil bolady, jyly, jaıly qonysta turatyn boldyq», deıdi Kúlásh apaı.
Atap ótsek, keshe Aqsý aýdanynyń turǵyndary da merekelik qonystoıyn atap ótti. Kezekte turǵandarǵa 50 páterdiń kilti berildi. Olardyń arasynda jetim balalar, kópbalaly jáne tolyq emes otbasylar, múgedek adamdar, apatty úılerde turatyn otbasylar jáne t.b. bar.
Aıta keteıik, Jansúgirov aýylyndaǵy bul jalgerlik kóppáterli úıdi salýǵa bıýdjetten 855 mln 709 myń teńge bólingen. Turǵyn úıdiń qurylysyn «Rıtm Stroı» JShS ótken jyldyń maýsym aıynan bastap júrgizdi.
Jyl basynan beri Jetisý oblysynda ártúrli qarjylandyrý kózderi esebinen 198,4 myń sharshy metr turǵyn úı paıdalanýǵa berildi. Bul rette 1 100-ge jýyq otbasy, onyń ishinde 145 kópbalaly jáne 158 az qamtylǵan otbasy jańa qonysqa ıe boldy.
Jetisý oblysy