Atyraýda Respýblıka kúnine oraı «Tuǵyry bıik Qazaqstan» atty saltanatty is-shara ótti. Onda memlekettik jáne qoǵamdyq qyzmettegi cińirgen eńbegi, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin 44 adam marapattaldy.
M.О́temisuly atyndaǵy akademııalyq qazaq drama teatrynda ótken jıynda oblys ákimi Serik Shápkenov óńir jurtshylyǵyn Respýblıka kúnimen quttyqtap, ár salanyń úzdikterine nagrada tapsyrdy.
«Bul tarıhı qujat el Konstıtýsııasy men zańdarynyń ústemdigin aıqyndap berdi. Biz jas býynǵa el tarıhyndaǵy osyndaı aıtýly kúnderdiń baǵasy men mánin uǵyndyrýmyz kerek. Qoǵamda shynaıy demokratııalandyrý úderisi júrip jatqanyn azamattardyń erki men bostandyǵynyń qamtamasyz etilýinen, azamattyq qoǵam qura alǵanymyzdan anyq ańǵarýǵa bolady», dedi Serik Shápkenov.
Prezıdent Jarlyǵymen memlekettik nagrada alyp, mereıi óskenderdiń arasynda eńbek ardagerleri men ár salada eńbek etetin jandar bar. Olar – munaıly óńirdiń dáýletin tasytyp, sáýletin asyryp júrgen memlekettik qyzmetshiler, munaıshylar, sportshylar men muǵalimder, medısına qyzmetkerleri, aýyl sharýashylyǵy, mádenıet pen óner, energetıka salasynyń, BAQ ókilderi. Máselen, «Parasat» ordenimen eńbek ardageri Mádına Ǵabdisálimova marapattaldy. Ol partııa jumysynda shyńdalyp, keıin 1982-1991 jyldary oblystyq kásipodaqtar keńesine jetekshilik etken. Qarapaıym eńbek adamynyń múddesin qorǵady. Tárbıelik, tálimdik mańyzy zor túrli komıssııany, qoǵamdyq uıymdardy, beıbitshilikti qorǵaý qoryn, oblystyq áıelder keńesin basqardy. Oblys ákimi janyndaǵy otbasy jáne demografııalyq saıasat komıssııasynyń keńesshisi retinde áıelderdiń áleýmettik, turmystyq problemalaryn sheshýge úlesin qosyp keledi.
Ár salada izdenisimen, iskerligimen tanylǵan 9 adam «Qurmet» ordenimen marapattaldy. Máselen, Halel Jamalov alǵashqy eńbek jolyn Qulsary avtokólik kásipornynyń elektrıgi retinde bastaǵan. Keıin Ońtústik Embi munaı barlaý ekspedısııasynda V sanatty mashınıst, burǵylaý sheberiniń kómekshisi, ınjenerlik-tehnıkalyq qyzmettiń mehanıgi bolǵan. Sońǵy jyldary Jylyoı aýdanynyń ákimi laýazymyna taǵaıyndalǵan edi. Qazir «Gorızont» JShS bas menedjeri qyzmetin atqaryp júr.
Jergilikti sportshylar arasynda Anatolıı Lysıak jattyqtyrýshy retinde tanymal. Buqaralyq sportty damytýǵa úles qosyp júrgen ol Atyraý qalasyndaǵy Q.Sátbaev atyndaǵy №19 mektep-gımnazııasynda deneshynyqtyrý páninen dáris beredi. Buǵan qosa, «Atyraý barystary» basketbol akademııasynda jas órenderdi sportqa baýlyp júr. Onyń shákirtteri oblystyq, respýblıkalyq, halyqaralyq dodalarda júldeger atanǵan.
Sondaı-aq 3 jerlesimiz III dárejeli «Eńbek dańqy» ordeniniń, 2 maıtalman «Shapaǵat» medaliniń ıegeri atandy. «Eren eńbegi úshin» medali 19 adamǵa berildi. Olardyń arasynda 40 jyldan beri BAQ salasynda eńbek etip júrgen tanymal qalamger, «Atyraý-Aqparat» JShS bas dırektorynyń orynbasary Isataı Balmaǵambetov te bar. Eńbek jolyn 1983 jyly qazirgi oblystyq «Atyraý» gazetinde bastaǵan. Keıin «Jas Alash» basylymynyń batys óńirdegi menshikti tilshisi retinde shyńdalǵan. Qalamy qarymdy jýrnalıst respýblıkalyq «Altyn orda» gazetiniń, sodan soń 10 jyl oblystyq «Atyraý» gazetiniń bas redaktory boldy.
Dál osyndaı medalmen marapattalǵan «Bylına» gazetiniń tilshisi Lev Gýzıkov ta óńir shejiresiniń túzilýine úles qosyp júrgen jan. Al Isataı aýdanyndaǵy J.Myrzaǵalıev atyndaǵy orta mekteptiń muǵalimi Tábıla Ismaǵulova oqýshylardy matematıka pániniń qyr-syryna baýlıdy. Otyz bes jyldan beri ustazdyq etýden jalyqpaǵan pedagog bilim ordasynyń dırektory da, basshynyń orynbasary da bolyp, óz tájirıbesin áriptesterimen únemi bólisip keledi.
Bul kúni M.О́temisuly atyndaǵy akademııalyq qazaq drama teatrynyń ártisi Ǵazıza Bısenova Qazaqstannyń eńbek sińirgen qaıratkeri atandy. Bir top atyraýlyqqa Qazaqstan Respýblıkasynyń Qurmet gramotasy berildi.
Atyraý oblysy