Májilis spıkeri Erlan Qoshanovtyń tóraǵalyǵymen Bıýro otyrysy ótip, aldaǵy jalpy otyrystyń kún tártibi naqtylandy. Depýtattardyń talqylaýyna bıznes júrgizý máseleleri boıynsha ózgerister men tolyqtyrýlar engizý týraly zań jobasyn birinshi oqylymda qaraý usynyldy.
Zań jobasy memlekettik baqylaý men qadaǵalaý júıesin retke keltirý, olardy júrgizýdiń ashyqtyǵyn arttyrý, kásipkerlik sýbektileri men memleket múddeleriniń tepe-teńdigin qamtamasyz etý arqyly kásipkerlik qyzmetti júrgizý jaǵdaılaryn jaqsartýǵa baǵyttalǵan.
Sonymen qatar depýtattar qoǵamdyq birlestikter máselelerine qatysty túzetýler boıynsha zań jobasyn birinshi oqylymda qaraıdy. Zań jobasy azamattyq qoǵamdy odan ári damytý jáne jańa qoǵamdyq birlestikter qurý tártibin ońaılatý maqsatynda ázirlendi.
Aldaǵy jalpy otyrysta Reseı Úkimetimen munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgeris engizý týraly hattamany ratıfıkasııalaý týraly zań jobasyn qaraý kózdelgen. Sondaı-aq eksporttyq-kredıttik agenttik jáne shıkizattyq emes taýarlardyń (jumystardyń, kórsetiletin qyzmetterdiń) eksportyn ilgeriletý máseleleri boıynsha ózgerister men tolyqtyrýlar engizý týraly zań jobasy ekinshi oqylymda qaralmaq. Qujat «KazakhExport» eksporttyq saqtandyrý kompanııasy» aksıonerlik qoǵamy eksportty qarjylyq qoldaýdyń biryńǵaı operatory úshin retteýshi rejimdi qalyptastyrý boıynsha Memleket basshysynyń tapsyrmasyn oryndaý maqsatynda ázirlendi.
Palata komıtetteri baılanys, sıfrlandyrý jáne aqparattandyrý salasynyń ınvestısııalyq ahýalyn arttyrý máseleleri týraly zań jobasyn jáne birqatar ratıfıkasııalanatyn kelisimdi jumys alýdy josparlap otyr. Olar – Sıngapýr Úkimetimen Investısııalardy kótermeleý men ózara qorǵaý týraly jáne Fransýz Úkimetimen jahandyq jylynýǵa qarsy kúres salasyndaǵy yntymaqtastyqty iske asyrý týraly arnaıy kelisimder.