Prezıdent byltyr Joldaýda Ulttyq qorǵa túsetin jyl saıynǵy ınvestısııalyq tabystyń 50 paıyzyn balalardyń arnaýly jınaqtaýshy esepshotyna aýdarýdy usyndy. Bul qarjy ár bala 18 jasqa tolǵanǵa deıin aýdarylatynyn, keıin jınaqtalǵan aqsha balalar kámelet jasqa tolǵanda baspana nemese bilim alýyna jumsalatynyn bildik. Endi, mine, Memleket basshysy arnaýly zańǵa qol qoıyp, baǵdarlama maquldandy.
Baǵdarlama negizinde keler jyldan bastap Ulttyq qordyń jyl saıynǵy ınvestısııalyq tabysynyń 50 paıyzy balalardyń arnaıy jınaqtaý shotyna aýdarylady. Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi retinde biz de jańalyqty estip, qýanyp qaldyq. Bul – kámelet jasqa tolyp, oń-solyn baǵamdap, qanaty qataıa bastaǵan jastarǵa úlken qoldaý dep túsinemiz. Muny biraýyz sózben balalardyń bolashaǵyna quıylatyn ınvestısııa desek bolady. Qarajat eldegi ár balanyń áleýmettik jaǵdaıyna qaramastan teńdeı úlesteriletini de qýantady. Eldiń demografııalyq ósimine zer salsaq, 1991 jyldan berige deıin týý kórsetkishi 15 paıyzǵa artqanyn ańǵaramyz. Mysaly, sol egemendik alǵan jyly 155 myń sábı dúnıege kelse, byltyr osy kórsetkish 403 myńǵa ósken. Búginge deıin qabyldanǵan keshendi sharalar, úılesimdi baǵdarlamalar eldegi demografııalyq ahýalǵa áser etkenin kórip otyrmyz. «Ulttyq qor – balalarǵa» jobasy sonyń zańdy jalǵasy dep túsindik.
Biz baǵdarlamanyń naqty nátıjelerin birneshe jyldan keıin kóre alamyz. Sol kezde halyq óz baǵasyn bere jatar. Al qazir bul baǵdarlamany qazaqstandyqtardyń jastarǵa shynaıy qamqorlyǵy, kómeginiń bir kórinisi deýge bolady. Balalar keleshekte osy qamqorlyqty túsinip, kómekti tıimdi paıdalansa, tıimdiligin kóredi dep úmittenemiz.
Elına MASAGÝTOVA,
«Qoǵamdyq kelisim» respýblıkalyq memlekettik mekemesiniń dırektory