Atyraýda daýylpaz aqyn, aqberen batyr Mahambet О́temisulynyń týǵanyna 220 jyl tolýyna oraı is-sharalar legi ótip jatyr. Sonyń biri – «Mahambet murasy – eldiktiń óshpes rýhy» atty respýblıkalyq ǵylymı-tájirıbelik konferensııa.
Konferensııany oblystyq mádenıet jáne tilderdi damytý basqarmasy men Ǵ.Slanov atyndaǵy oblystyq ǵylymı ámbebap kitaphana uıymdastyrdy. Maqsat – Mahambettiń ultyna uran bolǵan rýhy bıik týyndylaryn nasıhattaý. Jıynǵa elimizge belgili aqyn-jazýshylar, mahambettanýshy ǵalymdar, tarıhshylar men kitaphana qyzmetkerleri, óńir jurtshylyǵy qatysty.
«Atyraý – qazaq eline, tarıhy men ádebıetinde belgili tulǵalar dúnıege kelgen óńir. Sondaı tulǵanyń qatarynda Mahambet babamyz da bar. Jyl basynan beri aqynnyń shyǵarmalaryn nasıhattaý maqsatynda birneshe is-shara ótkizildi. Osy oraıda tek konserttik baǵdarlamalarmen, teatrlyq qoıylymdarmen shektelmeı, respýblıkalyq ǵylymı-tájirıbelik konferensııany uıymdastyrdyq. Munda belgili ádebıetshiler men tarıhshylardyń, zııaly qaýym ókilderiniń basyn biriktirip, aqyn jyrlary men ómirin keńinen nasıhattaýdy kózdedik», deıdi basqarma basshysy Ábil Jolamanov.
Batyr Mahambettiń qyrlary týraly Júsip Qadyr, Amangeldi Shamǵonov, Aqylbek Shaıahmetov, Bıbigúl Haıyrjanova, Ádilet Qabylov, Altynshash Tájiǵalıeva sekildi professorlar, mahambettanýshy ǵalymdar baıandama jasady. H.Dosmuhamedov atyndaǵy Atyraý ýnıversıtetiniń aǵa oqytýshysy, pedagogıka ǵylymdarynyń kandıdaty Bıbigúl Haıyrjanovanyń «Mahambet shyǵarmalary arqyly jas urpaqty otanshyldyq rýhta tárbıeleý men oqytýdyń ónegesi» atty monografııalyq eńbegi tanystyryldy.
«Eki ǵasyr boıy ómirsheńdigin joımaǵan Mahambet jyrlarynyń jańa qyry áli tolyq ashylǵan joq. Máselen, men óz zertteýlerim arqyly aqynnyń sırek kezdesetin óleńderin taptym. Onyń jyrlarynyń ár shýmaǵy men tarmaǵyn, uıqasyn tereń zerttep, 2007 jyly kandıdattyq dıssertasııa qorǵadym. Birneshe jyldan keıin bul eńbegim «Mahambet shyǵarmalary arqyly jas urpaqty otanshyldyq rýhqa tárbıeleý men oqytýdyń ónegesi» atty monografııalyq kitap bolyp jaryq kórip otyr. Bolashaqta túrik mamandarymen birge Mahambet óleńderin túrik tiline aýdarsaq degen josparymyz bar. О́ıtkeni Túrkııa elinde aqyn shyǵarmashylyǵyna erekshe qyzyǵýshylyq bar», deıdi B.Haıyrjanova.
Al ekinshi is-shara – birinshi respýblıkalyq teatrlar festıvali. Oǵan elimizdiń ár óńirinen iriktelgen jeti teatr qatysty. О́ner ujymdarynyń qoıylymyn baǵalaıtyn qazylar alqasyna Qazaqstannyń Halyq ártisi, Memlekettik syılyqtyń laýreaty Tuńǵyshbaı Jamanqulov jetekshilik etti. «Mahambet sózderiniń bári derlik – ótkir ári rýhty. Sol sebepten óner dodasy tartysty ótip, qoıylymdar asqan sheberlikpen sahnalanatynyna úmittendik», dedi T.Jamanqulov.
О́ner dodasynyń shymyldyǵy Mahambet atyndaǵy akademııalyq qazaq drama teatrynyń Táken Álimqulovtyń «Qosh bol, Qaraoı» rekvıemin sahnalaýmen bastady. Ár teatrdyń qoıylymy ózindik órnegimen kórermendi tánti etti.
Qazylar alqasynyń sheshimimen festıvaldyń bas júldesi «Qosh bol, Qaraoı» rekvıemin sahnalaǵan Atyraý oblystyq Mahambet atyndaǵy akademııalyq Qazaq drama teatryna berildi. «Juban» spektaklin usynǵan Batys Qazaqstan oblystyq H.Bókeeva atyndaǵy Qazaq drama teatry birinshi júldege laıyq dep tanyldy. Ekinshi oryndy «Álıhannyń amanaty» qoıylymymen N.Jantórın atyndaǵy Mańǵystaý oblystyq mýzykalyq drama teatry ıelendi. Mahambet atyndaǵy arnaıy syılyqty I.Omarov atyndaǵy Qostanaı oblystyq qazaq drama teatry «Aljır» qoıylymymen jeńip aldy.
Sondaı-aq Gaýhar Mangýlova «Úzdik rejısser», Temirbek Muhtarov «Úzdik ssenograf» atandy. Al «Úzdik er adam beınesi» atalymyn Medǵat О́miralıev, «Úzdik áıel adam beınesi» atalymyn Nurlygúl Jubatova ıelendi. Al «Ekinshi plandaǵy er adam beınesi» atalymyna Raýan Taımas, «Ekinshi plandaǵy áıel adam beınesi» atalymyna Jibek Úsenova ıe boldy. Bir top Mahambet atyndaǵy syılyq laýreaty atansa, birneshe qyzmetker «Mádenıet salasynyń úzdigi» tósbelgisimen marapattaldy.
Atyraý oblysy