Áleýmettik jelide belgili rejısser, pedagog, qoǵam qaıratkeri Ázirbaıjan Mámbetovtiń Jeltoqsan oqıǵasy týraly jazǵan esteliginen úzindi tarap jatyr, dep habarlaıdy Egemen.kz
Avtor Táýelsizdik ózi úshin 1986 jyldan bastalǵanyn jazady. Áýelde alańǵa "ne bolyp jatyr eken" degen áýestikpen barǵanyn da jasyrmaıdy.
"Repetısııadan keıin, búkil qalany shýlatyp bara jatqan ne jaǵdaı ekenin kóreıin degen nıet boldy. Árıne, jalǵyz emespin. "Júz estigennen bir ret kórgen artyq" deıdi ǵoı qazaq. Sol kórgennen bastaldy táýelsizdik.
Sol alańda bas ta jaryldy, basqa da jaryldy. Búkil ómirim qaq jarylǵandaı boldy. Oqydym, eńbek ettim, ataq aldym. Meniń keńes ókimetine ókpem bolmaýy kerek. Biraq, sol basyma tıgen taıaq qoǵamnyń bolmysyn kórsetti. Árkimniń basyna bir taıaq tónip turady eken, tek ol bireýge tıedi, bireýge tımeıdi. Osyny túsindim", degen óner qaıratkeri.
Ol muny – taǵdyrdyń isine balaıdy. Taǵdyrǵa ataǵyń da, aqshań da, bedeliń de túk isteı almaıdy degen paıym jasaıdy.
"Bir-aq sátte bárinen aıyrylyp, jumyssyz qaldym, Ǵazızadan jáne aıyryldym. Jalǵyz qaldym. Sol kezde meni qorǵap, tıisti jerlerge bir aýyz sóz aıtpady dep Qaltaı, Ábdijámil, Zeınollaǵa, tipti Sáken Júnisov pen Ákim Tarazılerge ókpeledim de. О́ıtkeni men bıligim, biligim jetkenshe olardyń pesasyn sahnaǵa shyǵardym, elge tanylýǵa kómektestim, ókpeleýge quqym bar dep oılaımyn.
Estelikte sol tusta teatr ekige jarylyp, keshe ǵana "Ázekelep" sońynda júrgender satyp ketkende, qatty kúıingenin aıtady rejısser.
"Sebebi – olardyń qalyptasýyna, ósýine, ataq alýyna, turmysynyń túzelýine jaǵdaı jasaǵan edim. Olar meniń jaǵdaıymdy nege túsinbeıdi dep ókpeleýge haqym bar ma? Biz barlyq máseleni birge talqylaıtynbyz, aqyldasyp sheshetinbiz. Sóıtip sengen adamdarym...
Áı, qoıshy solardy!.." deıdi Ázirbaıjan Mámbetov
Aıta keteıik, búginde qoǵam qaıratkeriniń atynda Astana qalasynda jastar teatry bar. Ázirbaıjan Mámbetov 1932 jyly dúnıege kelgen, 2009 jyly ómirden ozdy.