Senator Sultanbek Dúısembınov depýtattyq saýalynda qoqysty suryptaý jáne qaıta óńdeý máselelerin aıtty, dep habarlaıdy Egemen.kz Joǵarǵy Palatanyń baspasóz qyzmetine silteme jasap.
Senatordyń aıtýynsha elimizde jyl saıyn 4 mln tonnadan astam qaldyq jınalady, onyń tek 1 mln tonnasy ǵana suryptalyp, qaıta óńdeledi. Demek, qalǵan 3 mıllıon tonna qaldyq tabıǵatty lastap, ekologııany buzyp jatyr.
«Osy jyldyń 9 aıynda 5578 zańsyz qoqys alańdarynyń 50%-y joıyldy degen aqparat jarııalandy. Baıqaýymyzsha, qoqys polıgondary jyl ótken saıyn kóbeıip otyr. Bul jaǵdaılardyń barlyǵy elimizde turmystyq qaldyqtar men qoqystardy suryptap, óńdeýge baılanysty tıisti baǵdarlama, naqty áreketter algorıtmi joqtyǵyn kórsetip otyr. Kádege jaraýdan qalyp, aýyl-aýyldyń irgesinde úıilip jatqan maldyń jún-terisi de qoqys polıgondaryn toltyryp jatyr. Osynyń bárin kádege asyrsa sharýalar shamamen 14 mlrd teńge tabys tabar edi. Al qoqys alańdaryn toltyryp jatqan metall, qaǵaz, plastıktardy qaıta óńdeý nátıjesinde bul sıfr birneshe ese óser edi», dedi senator.
Depýtattyń sózinshe álemdik tájirıbede – bul sala ekonomıkaǵa shyǵyn emes, kiris ákeletin sektorlardyń biri.
Depýtat sondaı-aq senatorlar ótken jyldyń sáýir aıynda qoqysty suryptaýǵa jáne qaıta óńdeýge qatysty joldaǵan tıisti saýal joldaǵanyn, onda osy salada jınaqtalǵan máselelerdi ońtaıly sheshý boıynsha naqty usynymdar jazylǵanyn málimdedi. Sultanbek Dúısembınov osyǵan baılanysty Úkimet basshysyna máseleniń mańyzdylyǵy men ózektiligin taǵy atap ótip, tıisti memlekettik baǵdarlama ázirleýdi usyndy.