Paıdalanylmaı jatqan jáne jekelegen sharýashylyqtardyń quzyryna zańsyz ótip ketken jerlerdi qaıtarý qadamy elge bolsyn degen nıetten týyp otyr. О́ıtkeni ıeligindegi en jerdi ıgermeı, sharýaǵa ıkemdemeı bostan-bos ustaǵan latıfýndısterdiń kesirinen jurtymyz qanshama ıgilikten qaǵyldy. Osy olqylyqtyń ornyn toltyrý maqsatynda Prezıdent pármenimen biraz jumys qolǵa alynyp, nátıjesinde 10 mln gektar jer memleket menshigine qaıtaryldy.
Memleket basshysy Qasym-Jomart Toqaevtyń Joldaýynda aıtylǵan tapsyrmasyna sáıkes 2022-2023 jyldar aralyǵynda tıisti jumystar atqaryldy. Bul rette Prezıdent tapsyrmalaryn sapaly ári ýaqtyly oryndaý maqsatynda Premer-mınıstr Álıhan Smaıylovtyń ókimimen arnaıy memlekettik komıssııa quryldy. Onyń quramyna quqyq qorǵaý organdarynyń, mınıstrlikter men ákimdikterdiń ókilderi kirdi.
Júrgizilgen jumystardyń nátıjesinde paıdalanylmaı jatqan jáne zańnamany buza otyryp berilgen 10 mln gektar aýyl sharýashylyǵy jerleri memleket menshigine qaıtaryldy. Sondaı-aq jaıylymdyq jer tapshylyǵy máselesiniń ózektiligin eskere otyryp, qaıtarylǵan jerlerdi tıisti eldi mekenderge bekitý arqyly sharýalarǵa qatań tártippen naqty qajettilik úshin berilip jatyr.
Memleket basshysynyń tapsyrmalaryn oryndaýda «Amanat» partııasy janyndaǵy «Jer amanaty» komıssııasynyń qoǵamdyq-partııalyq baqylaýy mańyzdy faktorǵa aınaldy. Atap aıtqanda, atalǵan komıssııa qaıtarylatyn jerlerdi qaıta bólýdi baqylaýmen aınalysty.
Osylaısha, jerdi halyq arasynda odan ári ádil bólý máseleleri Úkimettiń erekshe baqylaýynda bolady.