Saýd Arabııasynda fýtboldan klýbtyq álem chempıonaty aıaqtaldy. Bul jarysta alty qurlyqtyń eń úzdik komandalary men alań ıeleri baq synady.
20 márte uıymdastyrylyp otyrǵan dúbirli dop dodasynda «Manchester Sıtıge» teń keler komanda tabylmady. Bıyl Anglııanyń Premer-lıgasy men ÝEFA-nyń Chempıondar lıgasyn jeńip alǵan Hosep Gvardıolanyń shákirtteri bul joly da qarsylas shaq keltirmedi. Djıddada ótken fınaldyq saıysta olar «Flýmınensemen» kúsh synasty. Alańǵa Erlıng Holann, Kevın De Brıýıne jáne Jeremı Doký syndy beldi oıynshylar shyqpaǵanyna qaramastan, «MS» brazılııalyqtardyń qaqpasyna jaýapsyz tórt dop soqty – 4:0. Bul matchta Hýlıan Alvares dýbl avtory atansa, Fıl Foden bir márte mergendik tanytty. Taǵy bir goldy Nıno óz qaqpasyna saldy. Sóıtip, «MS» óz tarıhynda tuńǵysh ret atalǵan jarystyń jeńimpazy atandy.
Qola medaldy Kaırdyń «Ál-Ahlıi» oljalady. Úshinshi oryn úshin básekede Japonııanyń «Ýrava Red Daımonds» klýbyn 4:2 esebimen utqan mysyrlyq klýb álem chempıonatyndaǵy óziniń tórtinshi qola medaline qol jetkizdi.