Jańa jyldyń basynda el turǵyndary kókeıde júrgen kóptegen saýalǵa tolymdy jaýap aldy. Memleket basshysynyń «Egemen Qazaqstan» gazetinde jarııalanǵan «Biz ozyq oıly ult retinde tek qana alǵa qaraýymyz kerek» atty san taqyrypty qamtyǵan súbeli suhbaty halqymyzdyń aldaǵy kúnge degen senimin bekitip berdi.
Memleket damýyna serpin beretin negizgi salalardy óristetýdiń keshendi baǵyttary qozǵalǵan suhbattaǵy ulttyq ıdeologııa, qoǵamnyń qundylyqtar júıesin jańǵyrtý, ulttyń jańa sapasyn qalyptastyrý sekildi rýhanı taqyryptar eldiń mádenı ómirine qatysty mańyzdy máselelerdi arqaý etýimen qundy.
Qasym-Jomart Kemeluly óz sózinde: «Biz ótkendi ańsaýmen ómir súrmeýimiz kerek. Kerisinshe, keleshegimizdi kemel etýge umtylyp, ulttyń ulylyǵyn naqty ispen dáleldeýge tıispiz. Dúnıetanymymyzǵa jat mádenıetterge kózsiz elikteýden, jalǵan patrıotızmnen, dańǵoılyq pen daraqylyqtan saqtanýymyz kerek. Halqymyzdyń boıyndaǵy kemshilikterge kóz juma qaramaı, odan arylýymyz qajet. Munyń bári kún saıyn qubylǵan turlaýsyz zamanda ómir súrip jatqan Qazaqstannyń keleshegi úshin aıryqsha mańyzdy», dep atap ótti.
Rasynda, eldiktiń eńselenýi, qasıet-qalybymyzdyń saqtalýy bizdiń rýhanı-mádenı ómirimizge tikeleı baılanysty. Urpaq ulttyq qundylyqtardy sińire otyryp, ýaqyt kóshinen qalmaýy kerek. Jańa múmkindikter dáýiri kóptegen ıgilikterge jol ashqanymen, óskeleń urpaqty bulyńǵyr baǵytqa qaraı tartyp ketpeýine asa mán bergen abzal. Aqparattyq tehnologııalardy jetik meńgergen, zaman kóshine ilese otyryp, ótkenniń ónegesin jadyna toqyǵan jastarymyz memleket erteńi. Prezıdentimiz, jasandylyq pen jalǵandyq oryn alǵan jerde jaǵymsyz áreketter boı kóteretinin alǵa tartyp, óner men mádenıet ókilderine, rýhanı salanyń qyzmetkerlerine mańyzdy oı tastap otyr.
О́zimiz qyzmet etetin taǵylym ordasynda osy máseleni árdaıym nazarda ustaýǵa tyrysamyz. Mýzeı qabyrǵasynda ótetin san alýan sharalardyń túpki ózegi ulttyq mádenıetimizdiń, tarıhymyzdyń, urpaq jadynda zerdeli kózqaraspen qattalýyna basymdyq beriledi. Suhbatta aıtylǵandaı, biz kóshke ilesetin emes, sol kóshti bastaıtyn elderdiń qatarynda bolýymyz kerek. Onyń alǵysharty – adaldyq. Ádiletti Qazaqstandy adal azamattar, paıym-parasaty joǵary, ultyna jany ashıtyn jandar qalyptastyrady.
Prezıdent suhbatynda Uly daladaǵy kóshpendiler órkenıetiniń murageri sanalatyn baýyrlas halyqtardyń mádenı-gýmanıtarlyq baılanysyn arttyrýdyń mańyzdylyǵy aıtyldy. Tarıhy teńiz, tamyry egiz túrki halyqtaryna ortaq qundylyqtar baýyrlas elderdi bir-birine jaqyndatatyn, dıplomatııalyq qarym-qatynastardy nyǵaıtatyn qýatty kúsh. Osy oraıda, baýyrlas halyqtardyń rýhanı muralaryn, tarıhı jádigerlerin nasıhattaý, kóshpeli kórmeler uıymdastyrýdyń mańyzy zor. Elimizde ótetin Dúnıejúzilik kóshpendiler oıyny Memleket basshysy atap ótkendeı, memleketimiz úshin tarıhı oqıǵa bolmaq.
Suhbattaǵy: «El tarıhynda erekshe orny bar tulǵalarǵa qurmet kórsetý dástúri elimizdiń jalpyulttyq biregeıligin nyǵaıta túsýge zor septigin tıgizedi. Bıyl áıgili ǵalym Qanysh Sátbaevtyń týǵanyna 125, dańqty batyrlar Saǵadat Nurmaǵambetov pen Raqymjan Qoshqarbaevtyń týǵanyna 100 jyl tolady. Sonymen qatar tarıhshylardyń paıymdaýynsha, Joshy ulysynyń irgesi qalanǵanyna – 800 jyl. Memlekettiligimizdiń tamyry tym tereńde jatqanyn áıgileıtin osy aıtýly dataǵa oraı keń aýqymdy zertteýler qolǵa alynady» degen joldar ǵylymı qoǵamdastyqtyń aldyna zor jaýapkershilik júktep otyr. Atalǵan sharalar tuǵyrly tulǵalardyń rýhyn asqaqtatyp qana qoımaı, olardyń telegeı-teńiz murasyn, ónegesin, júrip ótken jolyn keıingige úlgi etýimen qundy. Eń bastysy bul bastamalar ulttyq ǵylymǵa qosylǵan aıshyqty mura bolmaq.
Qoryta aıtqanda, halyq úshin asa mańyzdy áleýmettik-ekonomıkalyq salanyń basty baǵdarlary aıqyndalǵan, ishki jáne syrtqy saıasattaǵy ótkir máseleler qamtylǵan, el birligine keri áserin tıgizetin alypqashpa áńgimelerge úılesimdi núkte qoıǵan Prezıdent suhbaty aldaǵy ýaqyttaǵy baǵyt-baǵdarymyzǵa serpin beredi dep esepteımin.
Rashıda HARIPOVA,
QR Memlekettik Ortalyq mýzeıiniń dırektory