Memleket basshysy Qasym-Jomart Toqaev «Egemen Qazaqstan» gazetine bergen mazmundy suhbatynda elimizdi jańa baǵytta damytýǵa qatysty oılaryn ortaǵa salyp, mańyzdy máselelerdi kóterdi.
Prezıdent elimizde atqarylyp jatqan jańa reformalarǵa sholý jasap, aldaǵy baǵyt-baǵdarlarymen bólisti. Qazirgi ýaqytta memleketimizdiń barlyq salasynda eleýli ózgerister bolyp jatyr. Qaıǵyly qańtar oqıǵasynan keıin Konstıtýsııamyzǵa zaman talabyna saı ózgerister engizilip, bılik pen halyqtyń arasynda ashyq dıalog ornady. Jańa quramda «estıtin Úkimet» jasaqtalyp, áleýmettik salada qordalanyp qalǵan túıindi máseleler júıeli sheshimin taba bastady. Ulttyq qordan balalarǵa qarjy berý máselesin retteıtin zań kúshine endi.
Elimizdiń ár óńirinde jaıly mektepter boı kóterip, mádenıet oshaqtary jańaryp keledi. Bul rette «Esik» memlekettik tarıhı-mádenı mýzeı-qoryǵy janynan úlken vızıt-ortalyq salynyp jatqanyn aıta ketkim keledi.
Prezıdent suhbatynda buǵan deıingi halyqqa arnaǵan Joldaýlary men Ulttyq quryltaı otyrysynda kóterilgen máseleler áli de ózekti bolyp otyrǵanyn aıtty. Memleket basshysy Jańa Qazaqstan qoǵamyn qalyptastyrý baǵytyndaǵy aýqymdy jumystardy iske asyrý jalǵasa beretinine basa nazar aýdardy.
Bıyl elimiz syrtqy saıasatty damytýǵa qatysty mańyzdy is-sharalardy úılestirmek. Atap aıtqanda, elimiz Shanhaı yntymaqtastyq uıymyna, Ujymdyq qaýipsizdik týraly shart uıymyna, Azııadaǵy ózara is-qımyl jáne senim sharalary jónindegi keńeske, Túrki memleketteri uıymyna, Araldy qutqarý halyqaralyq qoryna, Azyq-túlik qaýipsizdigi jónindegi ıslam uıymyna tóraǵalyq etedi.
Bıyl elimizde Dúnıejúzilik kóshpeliler oıyny ótedi. Bul – Túrki álemin jaqyndastyratyn, tamyrlas elderdiń rýhanı yntymaqtastyǵyn jandandyratyn úlken bastama. Uly daladaǵy kóshpeliler órkenıetiniń murageri sanalatyn baýyrlas halyqtardyń mádenı-gýmanıtarlyq baılanysyn arttyrý óte mańyzdy.
Táýelsiz elimiz úshin mańyzdy oqıǵanyń biri – Joshy ulysynyń irgesi qalanǵanyna bıyl 800 jyl tolady. Osy tarıhı dataǵa oraı Prezıdent memlekettiligimizdiń tamyry tym tereńde jatqanyn aıtyp, tarıhty ǵalymdarǵa keń aýqymdy zertteýlerdi qolǵa alýdy tapsyrdy. Bul zertteý jumystaryna «Esik» memlekettik tarıhı-mádenı mýzeı-qoryǵy tarıhshy, arheolog mamandary da atsalysady.
Prezıdent: «Tarıh – bizdiń jalpyulttyq biregeıligimizdiń mańyzdy bóligi. Sondyqtan memleket dál qazir bul baǵytta júıeli jumys júrgizip otyr» deı kele, «San ǵasyrlyq tarıhymyzdy zertteý, tarıhı ádildikti qalpyna keltirý bizdiń negizgi mindetimizdiń biri bolyp qala beredi», dep atap ótti.
Suhbat barysynda Qasym-Jomart Toqaev: «Biz ozyq oıly ult retinde halqymyzdy ydyratatyn emes, biriktiretin joldy tańdap, tek alǵa qaraýymyz kerek. Jalpyulttyq qundylyqtar bárinen joǵary turýǵa tıis» degen pikir aıtty. Shynynda da, Memleket basshysynyń bul sózi barsha otandastarymyz ustanatyn basty qaǵıdaǵa aınalýy kerek. Bul baǵytta «Esik» memlekettik tarıhı-mádenı mýzeı-qoryǵy memlekettiń tarıhı-mádenı qundylyqtaryn zerttep, saqtaýda júıeli jumys atqara beredi.
Gúlmıra MUHTAROVA,
«Esik» memlekettik tarıhı-mádenı mýzeı-qoryǵynyń dırektory