Ál-Farabı atyndaǵy QazUÝ-dyń Halyqaralyq qatynastar fakýlteti 1995 jyly sol kezdegi elimizdiń Syrtqy ister mınıstri Qasym-Jomart Toqaevtyń tikeleı qoldaýymen qurylyp, negizgi oqý ornyna aınaldy. Fakýltet óz ýaqytynda quryldy, zaman talaby sony qajet etti.
Mınıstr bas bolyp, tájirıbeli dıplomattar, attasheler stýdentterge dáris oqydy. Jastar saıası máselelerge baılanysty suraqtaryn qoıatyn. Olar mınıstrge túrli tilde (qazaq, orys, aǵylshyn, qytaı) suraq qoısa, olar jaýapty sol tilde alatyn.
Bolashaq halyqaralyq dárejedegi mamandardyń, dıplomattardyń óz elimizde bilim alyp, jetilip, shyńdalyp shyǵýy – búkil halyqtyń múddesi edi. Qazaqstannyń kóptegen dúnıejúzilik uıymǵa múshe bolýy kezinde kásibı deńgeıi joǵary, saıası-ekonomıkalyq jáne rýhanı daǵdarystardy jeńe alatyn isker, bilimdi, mádenıetti tulǵany qalyptastyrýǵa fakýltet zor úles qosty.
Fakýltettegi jetekshi kafedralardyń biri – shet tilder kafedrasy. Joǵary dárejeli, zamanaýı talaptarǵa saı fakýltet túlekteri básekelestikke saı. Olardyń dıplomy álemde baǵalanady.
1996 jyly bastalǵan ınvestısııa saıasaty elimizde aǵylshyn tilin úırenýge betburys jasady. Qazirgi zamanaýı ǵylymnyń, mádenıettiń, saıasattyń ǵalamdaný dáýirinde, shet tiliniń qundylyǵy men dıplomatııalyq qarym-qatynas jasaýǵa, saýda men bıznes salalaryn damytýǵa zor múmkindikter týdy. Fakýltet túlekteriniń biliktiligi halyqaralyq standarttarǵa saı ekenin ýaqyt ta, zaman talaby da kórsetip otyr. Olar búginde halyqaralyq deńgeıdegi máselelermen aınalysatyn túrli memlekettik jáne sheteldik mınıstrlikterde, Prezıdent pen Úkimet apparattarynyń halyqaralyq bólimderinde jáne taǵy da basqa mártebeli oryndarda tabysty qyzmet atqaryp keledi. Elimiz shamamen 182 memleketpen qarym-qatynas ornatty jáne shetelderde 67 ókildigi bar. Túlekterimizdiń birqatary elimizdiń ishki-syrtqy dıplomatııalyq salalarynda abyroımen qyzmet atqaryp júr.
Men QazUÝ-da 51 jyl boıy shet tilinen (nemis, aǵylshyn) dáris oqydym. Onyń 20-ǵa jýyq jylynda kafedra meńgerdim. Fakýltettiń de, kafedranyń da kósh bastaýyna ynta-jigerimmen kiristim. Qazir de QazUÝ-dan qol úzgenim joq. Shaqyrǵan kezde bilim alýshylarǵa dáris oqımyn, kezdesýlerge turaqty baryp turamyn.
Roza QAIYRBAEVA,
Ál-Farabı atyndaǵy QazUÝ professory