Memleket basshysy Qasym-Jomart Toqaev bas basylymymyzǵa bergen suhbatynda jylý jelileriniń úzdiksiz berilýin qamtamasyz etý qajettigin atap ótti. Úkimettiń de kún tártibinde turǵan máselesi – bul. Jylytý maýsymyna daıyndyq jumystary, ásirese Balqash qalasynda bıyl qyzý júrgenin atap ótkenimiz jón.
Bıyl qala boıynsha 6,3 shaqyrym jylý jelisi aýystyryldy. Muhamedjanov kóshesindegi – 580 metr, Sábıtova kóshesindegi – 460 metr, Qaramende Bı kóshesindegi 470 metr jylý qubyrlary jóndeýden ótken. Ásirese, Balqashtyń Abýǵalıev kóshesindegi magıstraldyq jylý jelisi ábden tozǵandyqtan, apat jıi oryn alatyn. Endi mundaı apat bolmaıdy. Sebebi bul ýchaskedegi qubyr tolyqtaı aýystyryldy.
Jylý Balqashta 3 qazannan bastap, Saıaq kentinde 13 qazannan bastap berilgen. Qaladaǵy №6, 7, 8, 9 jylytý qazandyqtary qalypty jumys istep tur. Kómir qory da jetkilikti eken. Qaladaǵy 9 bilim berý nysany, 11 densaýlyq saqtaý salasyndaǵy mekeme men 593 turǵyn úı tolyǵymen jylýmen qamtylyp otyr.
Saıaq kentiniń jylýmen jabdyqtaý júıesin rekonstrýksııalaý úshin respýblıkalyq bıýdjetten 500 mln teńge bólingen. Qazandyqtarǵa 9 jylý almastyrǵysh apparaty alynyp, ornatylǵan. Tozyǵy jetken 300 metr jylý jelileri jóndelgen. «Kómir-Krg» JShS-men 86 mln 86 myń teńgege 6 020 tonna kómir jetkizýge kelisimshart jasasqan.
Jylytý maýsymynyń turaqty ótýi úshin Balqash qalasy men Saıaq kentinde 138 mln 250 myń teńge bólindi. Jóndeýge qosymsha materıaldar jáne apattyq qorǵa materıaldar satyp alyndy.
«Áleýmettik jelilerde jylýmen jabdyqtaý sapasy boıynsha kóptegen suraq bar. Barlyq saýal – meniń jeke baqylaýymda. Turǵyn úı qatynastary bólimi táýlik boıy jumys isteıtinin jáne kelip túsken ótinimder men ótinishterdi pysyqtaıtynyn atap ótkim keledi. Jylý kózi – Balqash JEO jumysynda 4 qazandyq agregaty jáne 4 týrbogenerator bar. Otyn qory mol. «Balqash Jylý» JShS TNS qala boıynsha shtattyq rejimde jumys isteıdi, qysym men temperatýra rejimi josparly kórsetkishterge sáıkes keledi. Jylytý maýsymynyń turaqty ótý máselesi kúndelikti baqylaýda», deıdi qala ákimi Sapar Sataev.
Byltyr jazda Premer-mınıstrdiń birinshi orynbasary Roman Sklıar Balqash qalasyna arnaıy jumys saparymen kelip, jylý elektr ortalyǵynyń jumys sapasymen tanysyp ketken edi. Jańa besinshi qazandyqtyń qurylysyn kórip ketken-tin. Qazir jylý magıstralinde №5 qazandyqtyń jekelegen shaǵyn toraptaryn montajdaý aıaqtalýǵa jaqyn, jabdyq gıdravlıkalyq synaqtan jáne gaz-aýa jolynyń tyǵyzdyǵyn tekserýden ótedi. Bolashaqta qazandyqty ornatý «Kazakhmys Energy» JShS BJEO jumysyn jaqsartyp qana qoımaı, lastaýshy zattardyń shyǵaryndylaryn azaıtýǵa tıis. Bul endi aldaǵy ýaqyttyń enshisinde. Bastysy, qazir qaladaǵy jylý qalypty berilip otyr.
Qaraǵandy oblysy,
Balqash qalasy