Memleket basshysy «Táýelsizdik bárinen qymbat» baǵdarlamalyq maqalasynda:«Aldaǵy tórtinshi onjyldyqtyń bizge júkteıtin mindeti – qýatty eldiń ıesi jáne kemel halyq bolý. Bul jolda saıası-ekonomıkalyq reformalardy jáne sanany jańǵyrtý úderisin jalǵastyryp, zaman talabyna beıimdelgen ulttyń jańa bolmysyn qalyptastyrýymyz kerek» dep aıtqany kózi qaraqty oqyrmannyń esinde bolar.
Ult bolashaǵyna qatysty tujyrymdamaly oıyn Qasym-Jomart Toqaev «Egemen Qazaqstan» gazetine bergen suhbatynda da aıtty. Osy ashyq áńgimeni qajetti tustaryn astyn syza otyryp, bastan-aıaq oqyp shyqtym. Prezıdent elimizdegi túrli máseleni qamtıtyn suraqtarǵa barynsha tolymdy, tushymdy jaýap bergenin atap ótken abzal.
Ult memleketimizdiń basty baılyǵy sanalatyn jeke adamdardan quralady. Adam kapıtalyn turaqty damytý – jyldam ózgerip jatqan qazirgi álemde tabysty el bolýdyń basty kepili. Táýelsiz memleketimizdiń ilgeri basýy adam kapıtalynyń, ıaǵnı ultymyzdyń sapalyq deńgeıine táýeldi ekeni túsinikti. Osydan eki jyl buryn ulttyq arnaǵa bergen suhbatynda Qasym-Jomart Toqaev «Árqaısymyz elimizdiń patrıoty bolýǵa tıispiz» degen bolatyn. Sondaı-aq Prezıdent ozyq oıly ult qalyptastyrýdyń maqsatyn «Biz ulttyń jańa sapasyn qalyptastyrý arqyly ádiletti memlekettiń jáne úılesimdi qoǵamnyń negizin qalaımyz», degen sózimen aıqyndap berdi.
Memleket basshysy qarym-qabileti zor, bilimdi, adal azamattar elimizdi alǵa bastaıtynyn únemi aıtyp keledi. Ozyq oıly ult – ulttyń jańa sapasy. Sondyqtan biz ulttyń jańa sapasyn qalyptastyrýǵa bir kisideı jumylyp, atsalysýymyz kerek.
Prezıdenttiń paıymynsha, memlekettik qyzmetshiler ózine júktelgen mindetti minsiz atqaratyn kásibı maman ǵana bolmaýy kerek. Olar árdaıym bastamashyl, naqty isimen elge paıda ákeletin jáne ózgeristerdiń ómirsheńdigin halyqqa kórsete alatyn azamattar bolýy qajet. Ádiletti Qazaqstan qurýda jańa kásibı daǵdylardy meńgerýge jáne ozyq bilimin tıimdi paıdalanýǵa qabiletti jastardyń róli arta túsedi. Oıy ushqyr, jaýapty jastarymyz bolashaqty baǵamdaı alady ári dáıekti damýǵa umtylady. Osy oraıda Memleket basshysynyń «Biz ozyq oıly ult retinde tek qana alǵa qaraýymyz kerek» suhbaty barlyq bilim berý uıymynda talqylanyp, pedagogter men bilim alýshylar óz pikirlerin ortaǵa salýy kerek dep sanaımyn. Nege deseńiz, jas urpaq elimizdegi mańyzdy oqıǵa, jańalyqtardan habardar bolyp, talqylaýǵa qatysyp, ózindik oı-pikirlerimen bólisip otyrsa, bul olardyń azamattyq belsendiligin, qoǵamdyq máselelerge kózqarasyn damytýǵa oń yqpal eteri sózsiz. Oıy ushqyr jastarymyz qatary kóbeısin desek, olarmen júrgiziletin tárbıe jumysy da júıeli ári pármendi, nátıjeli bolýǵa tıis.
Ozyq, aldyńǵy qatarly ult óz eline janashyr, otanshyl, zaman talabyna saı áreket etetin, bilimdi de bilikti, kásipqoı maman, eńbekqor azamattardan quralady. Olaı bolsa, árkim óziniń isin adal atqaryp, qoǵamdyq isterge belsendi aralasyp, týǵan óńirimizdiń, qorshaǵan ortamyzdyń kórkeıip, ósip-órkendeýine múddeli bolsa, ultymyzdyń mereıi asyp, el qýatynyń arta túserine senim mol.
Bıalash SÚIINKINA,
Bilim berý isiniń úzdigi
Qostanaı