Memleket basshysy Qasym-Jomart Toqaev «Egemen Qazaqstan» gazetine bergen suhbatynda elimizdiń geosaıası ustanymy, ishki ekonomıkalyq-áleýmettik áleýeti, Qańtar qasireti, qos bılik sekildi jaıtqa ashyq ári tushymdy jaýap berilipti.
Tolǵandyrǵan taqyryptyń biri – turmystyq zorlyq-zombylyq máselesi. Prezıdent otbasyndaǵy jáne basqa da túrli zorlyq-zombylyq áreketke qatysy keleli oı, kesimdi sóz qozǵady. Biz buǵan deıin Parlamentte de kótergen bul másele rasynda qoǵamda óte ózekti bolyp tur.
О́kinishke qaraı, qoǵamda turmystyq zorlyq-zombylyqqa qatysty rezonans týdyrǵan oqıǵalar da az emes. Bul zańda jetildiretin nárseniń áli dep kóp ekenin kórsetedi. Zań joq emes, bar. Qazirgi qoldanystaǵy zańnyń oryndalýyn kúsheıtsek, kóp nárse ońalary sózsiz. Ishki ister organdarynda jumys isteıtin azamattarmen sóıleskenimizde, bir jaıtty ańǵartyp edi. «Bizdiń qoǵamda qylmystyń sany burynǵydan kóbeıip ketken joq, tek sol týraly aqparat kóbeıip ketti», deıdi olar. Qazir mundaı jaǵymsyz aqparattyń kóptigi de elimizde jappaı sondaı jaǵdaı bolyp jatqandaı áser qaldyratyny da bar. Alaıda joqqa shyǵara almaımyz, bary ras. Biraq burynǵydaı emes, baqylaý kúsheıdi. Qazir barlyq jerde beınebaqylaý ornatylǵan. Mektepter de túgel baqylaýda. Osyǵan saı burynǵydan góri zorlyq-zombylyq aıtarlyqtaı azaıyp ketken joq. Sondyqtan Memleket basshysy aıtqandaı, zań talaptaryn kúsheıtý kerek. Buǵan qosa otbasy qundylyǵyn arttyrý qajet. «Otan ot basynan bastalady», bul beker aıtylǵan sóz emes. Munyń bári – bir-birimen astasqan uǵym. Birinshi – zań, ekinshi sana ózgerýge tıis.
Parlamentte buǵan qatysty zań qaralyp, jetildirilip jatyr. Keıde qoǵam bir jańa zań qabyldansa endi bári sap tyıyla qalady dep qabyldaıdy. Qoǵamda bilgili bir tártip pen talap qalyptasqansha ýaqyt kerek. Al zańdaǵy keıbir olqy tustar da ýaqyt óte kele kórinedi. Bul rette jaýapkershilik zań qyzmetkerlerine túsedi. Árbir ýchaskelik ınspektordyń da shash al dese bas almaı, ár isti zańdy turǵyda júzege asyrýy úlken ról atqarady. Zań talaptaryn biz estııar balalardan bastap nasıhattap, sanasyna sińirýimiz kerek. Muny gýmanıstik qundylyqtardy eskere otyryp, ulttyq mentalıtetke, el-jer jaǵdaıyna saı damytýymyz qajet. Qoǵamǵa qajetti ıdeologııa ulttyq otbasy qundylyqtary aınalasynan bastalýǵa tıis. Prezıdenttiń suhbatta aıtqan tujyrymdy oılary da osyǵan saıady.
Jarqynbek AMANTAI,
Májilis depýtaty