Oblys ortalyǵy Taraz qalasy men aýdandardaǵy eldi mekenderdiń birqatar kóshesiniń búlingen joldaryn jóndeý jumystary keıingi ýaqytta qarqyndy túrde júzege asyrylyp jatyr. Jergilikti halyqtyń talap-tilegine qulaq asqan óńir basshysy Erbol Qarashókeevtiń ózi bul máseleni jeke baqylaýyna alǵan edi.
Taraz qalasynan 100 shaqyrym qashyqta jatqan Talas aýdanynda ótken jyly 52 kósheniń joly jóndeýden ótti. Árıne, az jumys emes. Osylaısha, turǵyndar kótergen ózekti másele ońynan sheshilip otyr. Aýdan ákimdiginiń baspasóz qyzmeti keltirgen derekke júginsek, aýdanǵa qarasty eldi mekenderdegi joldardy jóndeý jumystary «Aýyl – el besigi» baǵdarlamasy aıasynda júzege asqan.
«Aýyldyqtar «Aýyl – el besigi» baǵdarlamasynyń sharapatyn kórip otyr. Máselen, ótken jyly Úsharal jáne Oıyq aýyldyq okrýgterinde barlyǵy 15,65 shaqyrymdy quraıtyn 21 kósheni jóndeýge 670 mln teńge qarajat bólingen edi. Qazynadan qarastyrylǵan qarajattyń 90 paıyzy respýblıkalyq, qalǵan 10 paıyzy aýdandyq bıýdjettiń úlesinde ekenin aıta ketken jón. Kóshelerdiń jolyn jóndeý máselesine kelgende jergilikti turǵyndardyń talap-tilegi tolyqtaı eskerildi. Jol jóndeý jumystary ýaqtyly ári tııanaqty atqarylǵanyn aıta ketken lázim. Jergilikti atqarýshy bılik ókilderi qolǵa alynǵan jumystyń sapasyna aıryqsha den qoıdy. Memlekettik satyp alý ashyq konkýrsy der kezinde ótkizilip, jeńimpaz merdigerlermen kelisimsharttar ýaqtyly rásimdelip, orta jóndeý jumystary mejeli ýaqytta júrgizildi. Búgingi tańda josparlanǵan jumys tolyǵymen aıaqtaldy», deıdi Talas aýdanynyń ákimi Nurbol Júnisbekov.
Aýdan basshysy keltirgen derekke sensek, «Aýyl – el besigi» baǵdarlamasy aıasynda bólingen qarajat únemdelipti. Sol únemdelgen qarjy esebinen Bostandyq, Aqkól jáne Oıyq aýyldaryndaǵy jalpy uzyndyǵy 3,65 shaqyrymdy quraıtyn 12 kósheniń joldary orta deńgeıdegi jóndeýden ótken.
Talas aýdanynyń ortalyǵy Qarataý qalasynda da jol jóndeý jumystary talapqa saı atqarylǵan. Monoqaladaǵy jalpy uzyndyǵy 16,8 shaqyrymdy quraıtyn alty kósheniń joly turǵyndar tilegine saı retke keltirilgen.
N.Júnisbekovtiń aıtýynsha, Keńes aýyldyq okrýgine qarasty Bóltirik sheshen aýylyndaǵy Nuraly kóshesine orta jóndeý jumystary júrgizilip, qalpyna keltirilgen. Buǵan qosa Maıtóbe aýylyndaǵy B.Momyshuly, Eseıhan aýylyndaǵy A.Omaruly, Qaraoı aýylyndaǵy Baıjan, Qasqabulaq aýylyndaǵy Tamdy áýlıe jáne Beıbitshilik, Tamdy aýylyndaǵy birneshe kóshe men Kóktal aýylyndaǵy Eseıhan kósheleriniń jol tósemi jóndeýden ótken. Jalpy alǵanda aýdan boıynsha 52 kósheniń joly retke keltirilgen eken.
Jambyl oblysy,
Talas aýdany