Bishkekke baratyndar belgili

Jarystyń alǵashqy kúni jan­kúıerler qyzylordalyq Oljas Syrlybaı men qostanaılyq Iýsýf Masıevtiń tartysyn ta­ǵat­syzdana kútti. 97 kg salmaq dáre­jesinde kúsh synasatyn bul balýandardyń esimi kópshilikke etene tanys. Oljas – elimizdiń birneshe dúrkin chempıony, qurlyq birinshiliginiń júldegeri. Iýsýf – jastar arasyndaǵy (U-20) álem chempıonatynyń kúmis júldegeri. Saqa sportshy men jalyndy jas ábden tireskenimen bir-birin ala almady. Esep – 1:1. Kúres túrleriniń erejesi boıynsha sońǵy upaıdy kim alsa, jeńis sonyń enshisine jazylady. Bul rette Syrlybaıdyń asyǵy alshysynan tústi. Masıev kúmispen kúptelse, almatylyq Islam Ýmaev pen qaraǵandylyq Erulan Ysqaqov qola medaldi qanaǵat tutty.

Azııa chempıonatynyń eki dúr­kin jáne Islam yntymaqtastyǵy oıyndarynyń júldegeri, jasós­pirimder men jastar arasyndaǵy álem birinshiliginde úshinshi oryndy ıelengen Amanǵalı Bekbolatov 55 kg salmaq dárejesiniń basty favorıti sanaldy. Alaıda atalǵan jarysta ol jeńis tuǵyryna kóte­rile almady. Jartylaı fınalda astanalyq Aıbek Aıtbekten aılasyn asyra almaǵan Amanǵalı úshinshi oryn úshin tartysta Al­maty oblysynyń ókili Erbol Ka­maı­levten utyldy. Nátıjesinde, asa jeńil salmaqta jetisýlyq Nurzat Qabdirahımovqa teń keler eshkim tabylmady. Fınalda ol Aıtbekovti utty. Kamalıevpen qatar, túrkistandyq Qasym Áden qola medaldi moınyna ildi.

Byltyr Qazaqstan Spar­ta­kıadasynda qarsylas shaq kel­tirmegen Muhamedáli Mamyrbek bul joly da jeńis tuǵyrynyń eń bıik satysyna kóteriledi dep topshylaǵan edik. Biraq olaı bolmady. Shymkenttik balýan 63 kg salmaqtyń jartylaı fınalynda óskemendik Dıas Áskerbaıdan utyldy. Nátıjesinde, Mamyrbek qostanaılyq Aıbek Esmuratovpen birge úshinshi satyǵa turaqtady. Al fınalda Dıas jambyldyq Erjet Jarylqasynnan ońbaı jeńildi.

73 kg salmaqta Nıkolaı Hap­ko­nyń mereıi ústem boldy. Sol­tústik óńiriniń týmasy sheshý­shi tusta Almaty oblysynyń ókili Erasyl Nurbosynovty qapy qal­dyrdy. О́skemendik Eldos Kamelev pen shymkenttik Ádilhan Sataev qola júldeni enshiledi. 82 kg sal­maqta Evgenıı Polıvadovtyń ekpinine eshkim shydamady. Jas­óspirimder Olımpıadasy men jastardyń álem birinshiliginde júlde alǵan atyraýlyq arlan Jetisý oblysynyń jas jolbarysy Álmır Tólebaevty bir ǵana upaı aıyrmashylyǵymen jeńdi. Jambyldyq Tarlas Áshirhanov pen qostanaılyq Mıras Barshylyqov úshinshi oryndy ıemdendi.

Jarystyń ekinshi kúni jan­kúıer­ler 67 kg salmaq dáreje­sindegi Almat Kebispaev pen Meıir­jan Shermahanbettiń aıqa­syn kórýge erekshe qushtarlyq tanytty. Bul balýandardyń ekeýiniń de baǵyndyrǵan belesi zor. Atap aıtsaq, 36 jastaǵy Almat álem chempıonatynda – 5 (1 kúmis, 4 qola), Azııa chempıonatynda – 6 (2 altyn, 3 kúmis, 1 qola), Azııa oıyn­darynda – 2 (1 kúmis, 1 qola) jáne Dúnıejúzilik Ýnıversıadada 1 ret (1 qola) jeńis tuǵyryna kó­terildi. 2012 jyly ol Tokıo jáne 2016 jyly Rıo-de-Janeıro Olımpıadalaryna qatysty. 27 jas­taǵy Meıirjannyń álem chem­pıonatynyń qola, Azııa birin­shiliginiń jeńimpazy jáne kúmis júldegeri, Azııa oıyndarynyń fınalısi degen ataǵy bar.

Astanada qos dúldúldiń joly shırek fınalda qıysty. Bul tartys 9:4 esebimen Shermahambettiń paıdasyna sheshildi. Shymkenttiń shymyr jigiti aqtyq synda ka­detterdiń Azııa chempıony, jas­tardyń álem birinshiliginiń qola júldegeri, jambyldyq Din­mu­hamed Qoshqarmen kúsh synasty. Bul bir keremet beldesý boldy. Báseke bastalǵan bette Meıir­jan eki upaı alsa, sol mezette qarsylasy ony shyr aınaldyryp, alty upaı ıelendi. Biraq soǵan bola Meıirjannyń saly sýǵa ketken joq. Birinshi kezeńniń sońǵy mınýtynda Shermahanbet Qoshqardy alyp uryp, qos jaýyrynymen jerge qadady. Taza jeńis! Úshinshi oryndy qaraǵandylyq Almat Kebisbaev pen Almaty oblysynyń namysyn qorǵaǵan Almatbek Amanbek ıelendi.

Byltyr 55 kg salmaq dáre­jesinde óner kórsetip, jas­tar arasynda álem chempıony atan­ǵan Ishar Qurbaev bıyl 60 kg salmaqta kúresýdi kóp kórdi. Ondaǵy maqsaty – aldaǵy ýaqytta ótetin Olımpııa oıyndarynyń irikteý saıystaryna qatysý. Biraq jańa salmaq jetisýlyq jigitke jaqpady. Ishar bastapqy bá­sekede san soǵyp qaldy. Bul sal­­­maqta qyzylordalyq Aıdos Sultanǵalıdiń myqtylyǵyna tánti boldyq. Álem chempıonatynyń eki dúrkin qola júldegeri, Azııa chempıony jartylaı fınalda óziniń syralǵy qarsylasy, aqtóbelik Meı­­rambek Aınaǵulovpen aı­qasty. Jalpy, osy eki sportshy asa iri ha­lyqaralyq dodalarǵa alma-kezek baryp júr. Meırambek te – osal balýan emes. Ol dúnıejúzilik dodada bir kúmis pen bir qolaǵa qol jetkizip, qurlyq birinshiliginde 2 kúmis pen 2 qolany qorjynǵa saldy. Azıadada úshinshi satyǵa jaıǵasty. Buǵan deıin ekeýi bir ret qana kezdesken eken. Ol kezde Aınaǵulovtyń asyǵy alshysynan tússe, arada jeti jyl ótkennen soń Sultanǵalı ketken eseni qaı­tardy. Fınalda Syr boıynyń saıypqyrany jetisýlyq Ǵalym Qabdýnasarovty san soqtyrdy.

77 kg salmaqtaǵy Demeý Ja­dyraevtyń jankeshtiligine rıza boldyq. Árbir kezdesýinde ol kil myqtylarmen beldesti. 34 jastaǵy kókjal birqatar asa iri halyqaralyq týrnırlerdiń je­ńimpazy, shymkenttik Omar Sataev pen Azııa chempıony, qa­raǵandylyq Ibragım Magama­dovty jeńip, fınalda qurlyq birinshiliginiń jeńimpazy, qos­tanaılyq Temirlan Shadýkaevty shań qaptyrdy. Magomadov pen shymkenttik Ábdiázım Qarabaev qolaǵa qol sozdy.

87 kg salmaqta astanalyq Aza­mat Qustybaev el chempıony atandy. Fınalda jaraqat alýyna baı­lanysty onyń qarsylasy ári komandalyq áriptesi Maqsat Saılaý bozkilemge shyqpady. Je­tisýlyq Dıas Qalen men óskemendik Temirlan Turdaqyn úshinshi oryndy qanaǵat tutty. Asa aýyr sal­maqta shymkenttik Álim­han Syz­dyqovtyń shoqtyǵy bıik boldy. О́skemendik Sala­vat Ahmetqalı ekinshi jáne qos­tanaılyq Mansur Shadýkaev pen shymkenttik Johar Uzarov úshinshi orynǵa taban tiredi.

Elordadaǵy jarysta top jar­ǵan balýandar endi 11-16 sáýir ara­lyǵynda Bishkekte jalaýy jel­bireıtin Azııa chempıonatyna qa­tysady. Qyrǵyzstannyń astanasyn­da 60 kg, 67 kg, 77 kg, 87 kg, 97 kg jáne 130 kg salmaq dáre­je­leri bo­­ıynsha Olımpııa oıyn­da­rynyń lısenzııalary sarapqa salynady. Qa­zaqstannyń grek-rım kúresi she­ber­leri arasynda 87 kg salmaqtaǵy Nursultan Tur­synov byltyr Qy­taıdyń Han­joý qalasynda alaýy tutanǵan Azııa oıyndarynda Parıj Olım­pıadasynyń joldamasyna ıelik etti. Iаǵnı alǵa qoıǵan maqsaty oryn­daldy. Sol sebepti de bul sal­maq­taǵy bizdiń balýandar Bish­kekte kúrespeıdi.

Bir aıta keterligi, Astanadaǵy jarysta 82 kg salmaqtaǵy Reseı chempıony, jastar arasyndaǵy (U-23) álem birinshiliginiń qola júldegeri, áskerıler arasynda álem chempıony Shámil Ol­jaev ta baq synaýǵa bel býǵan edi. Alaı­da Qazaqstannyń tól­qujaty bolmaǵandyqtan, sheshen sport­shysynyń bul dodaǵa qatysýyna ruq­sat berilmedi.