Úkimettiń keńeıtilgen otyrysynda Prezıdent asa ózekti máselege aıryqsha toqtalyp, elimizdiń barlyq azamatyna birdeı jaǵdaı jasap, shyn máninde kómekke muqtaj adamdarǵa járdem berý – áleýmettik memlekettiń basty mindeti ekenin atap kórsetti.
Qazir memleket bıýdjetiniń jartysynan kóbi áleýmettik salaǵa bólinip jatyr. Keıingi jyldary áleýmettik saladaǵy ınfraqurylymdy damytý úshin biraz jumys atqaryldy. Áleýmettik sala mamandarynyń, ásirese pedagogter men medısına qyzmetkerleriniń bedelin arttyrýǵa basa mán berildi. Endi azamattarǵa kórsetiletin qyzmettiń sapasyn jaqsartý qajet. Bul – eń aldymen, densaýlyq saqtaý salasyna qatysty másele bolyp jatyr.
Halyqtyń densaýlyǵy – eń mańyzdy másele. «Birinshi baılyq – densaýlyq» dep halqymyz tekke aıtpaǵan. Osy turǵydan alǵanda salany jedel jaqsartý qajet ekendigin el-jurt kórip te, bilip te otyr. Memleket basshysy «Mindetti áleýmettik medısınalyq saqtandyrý júıesiniń iske qosylǵanyna bes jyl boldy. Sodan beri bul salanyń bıýdjeti 2 ese artty. Bıyl 2,6 trıllıon teńge bólinedi. Alaıda medısınalyq kómektiń sapasy aıtarlyqtaı jaqsardy dep aıtýǵa bolmaıdy. Kóptegen qyzmet áli de qoljetimdi emes», dep oryndy syn aıtty.
Sonymen qatar kóp jaǵdaıda resýrstar tıimsiz jumsalatynyn, saldarynan bul salaǵa qosymsha qarjy bólip, bıýdjetke salmaq salýǵa týra keletinin atap ótti. «Úkimet medısınalyq saqtandyrý júıesiniń qyzmetin qatań baqylaýǵa alýy kerek. Bul júıe qarapaıym ári túsinikti bolýǵa tıis», dedi Prezıdent. Memleket basshysy eń ózekti máselelerdi atap kórsetip, árqaısysyna qatysty óz usynysy men paıymyn ortaǵa saldy.
Nurtóre JÚSIP,
Senat depýtaty