Zaman ilgeri ozǵan saıyn kez kelgen sharýany zyr etkizip tez yńǵaılaýdyń múmkindigi arta tústi. Bul rette izdegende qasyńnan tabyla ketip, aıaǵyńdy jerge tıgizbeı ala jóneletin taksılerdi onlaın ustaýdy da aıtýǵa bolady. Keıingi jyldary taksı shaqyratyn mundaı smartfon qosymshalaryn qoldanýshylardyń qatary tipten kóbeıdi. Endi osynaý ıgilikke múgedektigi bar jandar da qol jetkizip otyr.
Eńbek jáne halyqty áleýmettik qorǵaý mınıstrliginiń bastamasymen byltyr erekshe qajettilikteri bar adamdarǵa ınvataksı qyzmetin kórsetý kezinde taksı agregatorlaryn paıdalanýǵa múmkindik beretin qanatqaqty joba bastaldy. 2024 jyldyń 1 aqpanyndaǵy derekke súıensek, Astana men Almaty qalalarynda atalǵan qyzmet 9,9 myń ret kórsetildi. Al ótken jyly múgedektigi bar adamdarǵa ınvataksı qyzmeti 53,9 myń ret kórsetilgenin aıta ketken jón.
Invataksı qyzmetin kórsetý jyldamdyǵy men sapasyn arttyrý maqsatynda mınıstrlik ákimdiktermen birlesip osy qyzmettiń tetigine ózgertý engizý týraly sheshim qabyldaǵan edi. О́ıtkeni buǵan deıin azamattarǵa qyzmet alýdan bir kún buryn telefon arqyly jazylý qajet bolatyn. Bul olarǵa óz saparlaryn aldyn ala josparlaýǵa, ınvataksıdi kútýge májbúr etetin. Sondaı-aq ınvataksı qyzmetterin kórsetetin kólik quraldarynyń jetispeýshiligi sııaqty máseleler de boldy.
Osynaý keleńsizdikterdi retteýdiń bir joly – ınvataksı qyzmetine taksı agregatorlaryn tartý. Mundaǵy basty shart – saparlardyń aqysynan paıyz ustamaý. Ádette mundaı paıyz agregator platformalarynyń paıdasyna aýdarylatyn. Osy bastamaǵa qoldaý bildirgen «Iаndeks» kompanııasy jobaǵa óteýsiz negizde qatysýǵa nıet bildirdi. Sonymen byltyrdan beri múgedektigi bar azamattar Iаndeks Go mobıldi qosymshasy arqyly ınvataksı qyzmetin qoldanyp keledi. Bul qyzmetti alýshy úshin kólikti tezirek tańdaýǵa, onlaın rejimde tapsyrys mártebesin qadaǵalaýǵa jáne saparlarǵa monıtorıng jasaýǵa múmkindik beredi. Atalǵan qosymshada múgedektigi bar adamdar júrgizýshige sapardaǵy erekshe qajettilikteri týraly eskertýi úshin arnaıy múmkindikter ekrany iske qosyldy. О́z kezeginde júrgizýshiler adamdy kólikke otyrǵyzý jáne odan túsýde qalaı kómek kórsetýge bolatyny sekildi arnaıy nusqaýlar alady.
Qanatqaqty jobaǵa alǵashqy kezeńde Astana jáne Almaty qalalarynan múgedektigi bar adamdardyń fokýs-toby qatysady. Joba 2024 jyly da jalǵasyp jatyr. Bolashaqta jańa formatta qyzmet kórsetýdi múgedektigi bar adamdardyń basqa toptaryna keńeıtý jáne eldiń barlyq óńirinde qoldaný josparlanyp otyr.