Almaty kópsalaly klınıkalyq aýrýhanasynyń perzenthanasynda úshem dúnıege keldi. Úsh sábıge tolyqqan otbasynyń aıaýly kelinshegi buǵan deıin de úshem týyp kópbalaly ana atandy, dep habarlaıdy Egemen.kz.
Perzenthana ókilderiniń aıtýynsha, áıel ekinshi ret dúnıege úshem ákeletini belgili bolǵan sátten bastap Jambyl aýdandyq ortalyq aýrýhanasynyń bilikti dárigerleri ony erekshe baqylaýǵa aldy.
Kazinform tilshileriniń jazýynsha, kelinshek júktiliktiń 30-shy aptasynda Almaty kópsalaly klınıkalyq aýrýhanasyna aýystyryldy. Al 32 aptasynda úsh birdeı sábı kesar tiligi arqyly dúnıege keldi.
«Náresteler 2 170, 1 490, 1 900 gramm salmaqpen dúnıege keldi. Alǵashqy kúnderi sábılerdiń jaǵdaıy aýyr bolyp, ınvazıvti emes SIPAP apparatynda jatty. Tek jetinshi kúni kópbalaly ana sábılerimen qaıta qaýyshty. Dárigerler, akýsher-gınekologtar, neonatolog-reanımatologtar men medbıkelerdiń kómegimen jańa týǵan sábılerdiń árqaısysy úsh aptanyń ishinde 500-den 1 kelige deıin salmaq jınaı aldy», dedi joǵary sanatty akýsher-gınekolog Gúljahan Jumadýlaeva.
Bir ul, eki qyzdy dúnıege ákelgen Sholpan Mamasheva men jubaıy Jarqyn Baǵlaev kishkentaılarǵa Dilnáz, Gúlnáz,Temirlan esimderin beripti.
«О́mirge ekinshi ret úshem ákeldim. 2020 jyly tabıǵı jolmen sábılerimdi týamyn degende jaǵdaıym kúrt nasharlap, nárestelerim shala týǵan edi. Dárigerler bar kúshin salsa da, tek bir balamdy qutqaryp qaldy. Bul joly men júktilikke muqııat daıyndaldym, bilikti dárigerlerdi tańdadym jáne barlyq qajetti prosedýradan aldyn ala óttim. 30 aptada men Almaty kópsalaly klınıkalyq aýrýhanasynyń perzenthanasyna túsip, josparly kesar tiligi arqyly bosandym. Sábıler merziminen buryn dúnıege keldi, sondyqtan jaǵdaıy aýyr boldy. Biraq men dárigerlerge sendim, bilikti mamandardyń arqasynda úsh kishkentaı perishtemdi qolyma aldym. Endi men segiz balanyń anasymyn», dedi baqytty ana Sholpan Mamasheva.