Jyl saıyn, ásirese kóktem, kúz aılarynda juqpaly vırýstar kúshine minip, eldi ábigerge salyp jatady. Osy joly qyzylsha asqynǵanda balalar jappaı vaksına saldyryp, juqpaly ınfeksııanyń beti qaıtty. Endi, mine, birer kún buryn elimizdiń Bas memlekettik sanıtarlyq dárigeri, vıse-mınıstr Aıjan Esmaǵambetova aýa-tamshy arqyly juǵatyn ınfeksııalyq aýrýlardyń taralýyn aldyn alý jónindegi profılaktıkalyq sharalardy kúsheıtý týraly qaýlyǵa qol qoıdy.
Osylaısha, sanıtarlyq maska taǵý rejimi qaıta engizildi. Este bolsa, 2019 jyly koronavırýs ınfeksııasy týraly habar taraǵanda kópshilik resmı aqparatqa asa nazar aýdara qoımady. Al qazir turǵyndar saqtyq sharalary týraly eskertýlerdi qalt jibermeıdi. Belgili bolǵandaı, búginde elimizde epıdemııalyq ahýal turaqty. Áıtse de koronavırýs, qyzylsha, tumaý syndy basqa da jiti respıratorlyq juqpaly vırýstar aldaǵy eki-úsh aptada kúsheıip, izinshe kóp uzamaı-aq basylýy múmkin. Mundaı boljamdy mamandar qazirgi juqpaly aýrýlardyń taralý jıiligin, ótken jyldardaǵy epıdemııalyq ahýaldy jáne basqa da faktorlardy basshylyqqa alyp usynyp otyr.
Qujatqa sáıkes densaýlyq saqtaý uıymdarynda 8 aqpannan bastap sanıtarlyq maska rejimi engizildi. Iаǵnı eldegi barlyq oblyspen qosa Astana, Almaty jáne Shymkent qalasynyń densaýlyq saqtaý basqarmalary, aýmaqtyq sanıtarııalyq-epıdemıologııalyq baqylaý departamentteriniń basshylaryna medısınalyq uıymdardyń personaly men emhanaǵa kelgen pasıentterdiń medısınalyq maska paıdalanýyn qadaǵalaý tapsyryldy.
Buǵan qosa oblystardyń, Astana, Almaty jáne Shymkent qalasynyń ákimdikterine, ortalyq memlekettik organdarǵa, jeke jáne zańdy tulǵalarǵa menshik nysanyna qaramastan, halyq kóp jınalatyn jerlerde medısınalyq nemese matadan jasalǵan maskalardy paıdalaný usynylady. Bul degenińiz, usynys áýejaı, temirjol vokzaldary, bazar, saýda oıyn-saýyq ortalyqtary, saýda úıleri, teatr, kınoteatr, halyqqa qyzmet kórsetý ortalyqtary, bank sekildi qoǵamdyq oryndarǵa da qatysty degendi uqtyrady. Iá, qoǵamdyq oryndarǵa qatysty qabyldanyp jatqan sharalar usynys qana, ıaǵnı qatań talap qoıylyp jatqan joq. Bylaıǵy kúnderi, ásirese, vırýs kúsheıetin mezgilderde óziniń, jaqyndarynyń saýlyǵyn oılaǵandar saqtyq sharalaryn eskerip júrse, quba-qup.
Qazir elde koronavırýs ınfeksııasy boıynsha jaǵdaı qaýipti emes. Naýqastardyń basym kópshiliginde syrqattyń saldary jeńil ótip jatqan kórinedi. Aýrýhanada jatqan sanaýly pasıenttiń de jaǵdaıy jaqsy. Vıse-mınıstr osy tusta alańdaýǵa negiz joq ekenin taǵy bir márte eske saldy.