Prezıdenttik jastar kadrlyq rezerviniń forýmy aıshyqty oqıǵa boldy. Jıynda Memleket basshysy memlekettik apparattyń ózekti máselelerine keńirek toqtalyp, jastarǵa senim artyp, joǵary jaýapkershilik júktedi.
Prezıdent «Az sóılep, kóbirek jumys istegen jón» degen qaǵıdany berik negiz retinde ustanýǵa shaqyrdy. Sondaı-aq batyl, muqııat zerttelgen bastamalar qajet ekenine basa toqtaldy.
Aqıqatyna kelsek, bul joba sanasynda sáýlesi bar, bilimdi, bilikti, qajyr-qaıraty mol jastardy ekonomıka salasyna keńirek tartýǵa múmkindik berdi. Rezervte bola otyryp, jańa dostar taptyq, rýhanı, kásibı turǵyda aralasatyn, keńesetin, oı bólisetin ortaǵa keneldik.
Prezıdenttik jastar kadrlyq rezervi jyl boıyna iske asatynyna óz tájirıbem jarqyn mysal bolady. Forýmnan bir kún buryn ǵana rezerv ókili retinde maǵan zor senim kórsetilip, Memlekettik áleýmettik saqtandyrý qoryna basshylyqqa taǵaıyndaldym. Endigi bizdiń mindet adal, taza eńbek etip, el men Prezıdenttiń senimin aqtaý dep bilemin.
Aıbol ARǴYNǴAZINOV,
Memlekettik áleýmettik saqtandyrý qorynyń bas dırektory