Qostanaıdaǵy oblystyq kitaphanada balalar ádebıetiniń klassıgi Berdibek Soqpaqbaevtyń 100 jyldyǵyna arnalǵan ádebı kesh ótti. «Balalar álemin tańǵaldyrǵan talant» dep atalatyn taqyryp aıasynda ótken is-sharaǵa óńirdiń zııaly qaýym ókilderi, joǵarǵy oqý oryndarynyń ustazdary, stýdentter men mektep oqýshylary qatysty.
Keshke qatysýshylar «Meniń atym – Qoja» fılminen úzindi tamashalap, jazýshynyń ómiri men qyzmeti, shyǵarmashylyǵy týraly áńgime órbitti.
Fılologııa ǵylymdarynyń kandıdaty Kenjegúl Esirkepova jazýshynyń áıgili «Balalyq shaqqa saıahat», «Meniń atym –Qoja», «Qaıdasyń, Gaýhar?» povesteri men «О́lgender qaıtyp kelmeıdi» romanynyń kórkemdik ereksheligine toqtalyp, qalamgerdiń jazýshylyq zerthanasyna qatysty qyzyqty maǵlumattardy aıtyp berdi.
Al qalamger shyǵarmalaryn bala jastan jastanyp oqyp ósken jýrnalıst Dáýrenbek Ábdibek: «Jazýshy týyndylarynyń qatardaǵy kórkem dúnıelerden ereksheligi – oqyrmanyn ómirge, adaldyqqa, qaısarlyqqa, eńbeksúıgishtikke úırete alatyndyǵynda», degen oı aıtty.
«О́z basym Berdibek Soqpaqbaevtyń kitaptaryn bala kezimizden oqyp óstim. Jazýshynyń shyǵarmalary azamat bolyp qalyptasýyma kóp áser etti desem bolady. Meni tárbıelegen Berdibek Soqpaqbaev dep kóp jerde aıtyp ta júrmin. Berdibekpen qatar ómir súrdik, qasymyzda júrgen aqylshymyz boldy. Eńbekke tárbıeledi, qıyndyqta moıymaı, jol taba bilýge, adal ómir súrýge úıretti», deıdi jýrnalıst. Kesh barysynda qalamgerdiń ár jyldary jaryq kórgen kitaptarynyń kórmesi ashyldy.
Qostanaı oblysy