Oblystyq tarıhı-ólketaný murajaıynda Qazaqstannyń halyq jazýshysy, Memlekettik syılyqtyń laýreaty Sáken seri Júnisovtiń týǵanyna 90 jyl tolýyna oraı shyǵarmashylyǵyn nasıhattaýǵa arnalǵan kórme osylaı atalady.
Jeti qazyna degen uǵym qulaqqa sińip, jadymyzda jattalǵan soń tosyndaý taqyryp ekendigi de ras. Áıtse de ózin-ózi aqtap tur. Seriniń keıingi urpaǵyna qaldyrǵan máıegi mol qazynasy kól-kósir. Tabıǵat bir boıyna san túrli óner syılaǵan Sáken seriniń qazaqtyń qara sóziniń qaımaǵyn qalqyǵan sheshendigin, alqaly topta sóz bastaǵan kósemdigin, ádemi qońyr daýsymen shyrqap salǵan ánshiligin kózimiz kórgen. Al boz kilemdegi beldesýin estidik. Ilki zamandaǵy el turmysy, etnografııa shyǵarmalaryna shyraı bergen.
«Aqan seri» dıalogııasynda janyńa sonshalyqty jaqyn baǵzy zamannyń beınesi qutty kórkem sýretteı beınelenedi. Kúreńbaı synshynyń Qulagerdi synaýyna kóńil aýdaryńyzshy. «Shirkinniń turqyn qarashy, turqyn, on eki taspadan órgen uzyn bıshikteı. Kúzendeı búktetile shapqanda turqy qysqa buzaý tulyp attaryńnyń eki-úsh attaǵanyn bir-aq alatyn qaryshty janýar. Terisi qandaı juqa – kózel etiktiń bylǵarysyndaı map-maıda. Et pen teriniń arasynda jyltyraǵan bir maı joq, basqa attar kóbikke malynǵanda, qulaǵynyń túbi de jipsimeıtin kónbis-aq. Denesinde bir japyraq aram et joq, tamyrlary bilem-bilem bolyp shodyraıýyn qarańyzshy. Qansha shapsa da basy aınalmaıtyn, qany mol, tynysy tarylmaıtyn qulash keńirdek, talys tanaý... Jaıasy qandaı jazyq, qasqyr jaýyryn, túlki tós, qoıan jondy – táýlikke tanbaı shapsa da teńselip, shatqaıaqtamaı sadaqtyń oǵynsha túzý shabatyn maldyń belgisi».
Kórmege tuǵyryna qondyrylǵan dombyra, qyran búrkit, beren myltyq, almas kezdik, qumaı tazy, oıýly shapan tárizdi buıymdar qoıylypty. Osynyń barlyǵy Sáken seriniń shyǵarmasynda bar náshimen, qadir-qasıetimen, syr-symbatymen oqyrman nazaryna usynylǵan. Eldiń rýhanı qazynasyn kemeldendiretin de, tanym aspanyn nurlandyratyn da tusy mol.
Kórmeniń ashylý saltanatynda aqyn Erbolat Baıat, ádebıetshi ǵalym Sábıt Jámbek tárizdi seriniń kózin kórgen azamattar sóz sóılep, ádebıetti súıetin qaýymǵa esti estelikterin aıtyp berdi.
«Murajaıda mundaı shara tuńǵysh ret ótkizilip otyr. Aldaǵy ýaqytta «Sandyqtaǵy qazyna» atty jobany qolǵa alǵaly otyrmyz. Attyń jalynda, túıeniń qomynda kún keshken ata-babamyz qymbat qazynasyn sandyǵynda saqtaǵan ǵoı. Al bizdiń búgingi qazyna babalarymyzdan qalǵan rýhanı mol muranyń juqanasy», deıdi mýzeı dırektory Qudaıberli Myrzabek.
Altyn sandyq aıqara ashylyp, Kóksheniń dalasyn kóneniń qazynasymen kórkeıtip tursa, tipti ǵajap emes pe!
Kókshetaý