Ilkidegi danyshpandardyń «sóz óziniń shyrqaý shyńyna jetkende mýzykaǵa aınalady» degen kórkem tujyrymy bar. Al túrki mıfologııasynda dúnıe yńyranǵan, kúńirengen daýystan jaralǵan degen ańyz-ápsanalar joǵarydaǵy oıymyzdy qýattap, sáýletine sáýle túsirip tur. Demek sóz qaǵazǵa túspesten buryn, qalamgerdiń sanasynda áýen bolyp áýelep turmaı ma eken? Zady, sóz zergeri Júsipbek Aımaýytulynyń da jan dúnıesinde osyndaı ǵalamat qubylystardyń bolǵany aqıqat.
1921 jyly 31 qańtarda ótken Halyq aǵartý komıssarıaty alqasynyń májilisinde Júsipbek Aımaýytuly Komıssar orynbasary jáne kórkemdik sektor meńgerýshisi qyzmetine taǵaıyndalǵan. Kórkemdik sektor respýblıkadaǵy óner máselesin sheshýge basshylyq jasady. Atap aıtqanda, ádebıet, mýzyka, beıneleý óneri salalaryna jáne jalpy teatr isine, óner mektebi jáne arnaýly stýdııa uıymdastyrý jumystaryna Júsipbek jetekshilik etken. Jastardyń oıyn-saýyq keshterine qatysyp, dombyra tartyp, án salǵanyn, sonymen qatar spektakl qoıyp, onda basty rólde ózi oınaǵanyn zamandastarynyń esteliginen ańǵara alamyz.
«Bul týraly keńes odaǵynyń batyry, jazýshy Baýyrjan Momyshuly: «Men Júsekeńniń tikeleı shákirti bolamyn. Odan oqyǵan úsh adam qatarǵa iliktik. Men, Qurmanbek Saǵyndyqov jáne Ábdilda Tájibaev. Qalǵandarynyń deni esimde qalmapty. Júsekeń óte mádenıetti, ónerli, kishipeıil adam edi. Mýzyka aspabynyń bárinde oınaıdy, jaqsy daýsy bar edi. О́ziniń án shyǵaratyny bar eken. Skrıpkada tamasha oınaıtyn. Aspaptardy ózi jasaıtyn. Etikti jaqsy tigetin. Meniń oıymsha, ol kisige ótirik jala jabyldy. Oǵan meniń kózim anyq jetedi. Keńes ókimetine qarsy úndeý jazypty degen sóz – jala. Túbi aqtalatyn uly adamnyń biri – osy Júsekeń», dep ári qaraı shyǵarmalaryn tizbeleı jóneldi», dep eske alady 1977 jyly qarasha aıynda batyrdyń óz aýzynan estelik jazyp alǵan alashtanýshy ǵalym, fılologııa ǵylymdarynyń doktory, professor Tursyn Jurtbaı.
Júsipbektiń ózi sekildi ónerpazdardy janyna erekshe jaqyn tutqanyn shákirti Qalabaı Bekdýllaevtyń sózinen baıqaımyz. Onda jazýshynyń Jumat Shanınmen, Qurmanbek Jandarbekovpen jáne aıtýly ánshi-aqyndar Isa Baızaq, Ámire Qashaýbaevpen tyǵyz baılanysta bolǵany aıtylady. «Bul ártister Shymkent qalasyna kelgen bette-aq jarqyn dostary retinde Aımaýytulynyń úıiniń tórin bermeıtin», deıdi ol.
Kóbi bile bermes. Júsipbektiń dástúrli ónerdiń bizge aman jetýine úlesi zor. Ol Aleksandr Zataevıchtiń «Qazaqtyń 1000 áni» jınaǵyna 29 án men 1 kúı qosqan. Onyń ishinde tanymal «Ǵalııa», «Qaratorǵaı», «Qarǵam-aý» sekildi ánder bar. A.Zataevıch jınaqtyń sońynda «Oryndaýshy Aımaýytuly Júsipbek. Pavlodar ýezi, Baıanaýyl aýdanynyń týmasy» dep kórsetken.
Al onyń Alash polkine arnalǵan «Alash urany» marshy – klassıkalyq Eýropa mýzykasy men qazaqtyń joryq jyrlarynyń sıntezinen jasalǵan bógenaıy bólek shyǵarma dersiz. Saıyp kelgende, jazýshynyń mýzykalyq murasy áli de kóp zertteýdi talap etedi. Júsipbektiń shyǵarmashylyq geografııasyndaǵy tolyq ashylmaı jatqan araldyń biri osy.