Oblystyq tarıhı-ólketaný mýzeıinde aqyn, jyrshy, qobyzshy Málik Álmuratovtyń ómiri men shyǵarmashylyǵyna arnalǵan «О́mir jyryn jyrlaıdy aqyn júrek» kitabynyń tanystyrylymy ótti. Bul jınaqqa aqynnyń «Aqbıkesh» poemasy, «Jamal qyz», «Áıel teńdigi» óleńderi, Jamal qyz ben Zákárııa, Qazbaı, Bedermen aıtystary, «Abat batyr» jyry endi. Jınaqqa engen óleńder men jyrlar aqynnyń qyzy Sulýshash Maqasheva uzaq jyl saqtap kelgen qoıyn dápterlerden kóshirilip, oblystyq tarıhı-ólketaný mýzeıiniń qoldaýymen jaryq kórdi.
Málik Álmuratov 1907 jyly Yrǵyz aýdanynyń Jıdelibulaq degen jerinde dúnıege kelgen. 1932-1936 jyldary Yrǵyzdaǵy halyq teatrynda túrli sahnalyq rólderdi somdap, odan keıin Mamyr degen jerde keńes ókimetiniń halyqtyń saýatyn ashýǵa arnalǵan «Qyzyl otaý» uıymyn basqarǵan. Sol jyldary «Qyzyl otaýǵa» oqýǵa kelgen adamdardan kóne jyrlar men ańyzdardy, aıtystardy jazyp alǵan. Málik Álmuratov óziniń ustazy Tilepbergen jyraýdan «Abat batyr» jyryn úırenip, qaǵazǵa túsirgen. Osy jyrdyń tolyq nusqasy 1965-1966 jyldary «Qazaq ertegileri» jınaǵynyń II tomynda jarııalanǵan. Málik jyraý 1942 jyly soǵysqa alynyp, 1943 jyly Belarýs maıdanynda jambasynan aýyr jaralanyp, elge oralǵan soń áýeli Yrǵyzda, keıin qazirgi Áıteke bı aýdanynyń «Jabasaq» keńsharynda mektep muǵalimi bolyp jumys isteıdi.
Aýyl arasynan uzap shyqpasa da, kókirek kózi ashyq jan el ishindegi ańyz-áńgime, qıssa-dastan men aıtystardy qaǵazǵa túsirip qana qoımaı, halyq basynan ótken oqıǵalardy da túrtip otyrǵan. Jazǵandaryn jurt kózine kórsetpeı, sandyǵynda ustaǵan. Bul kisiniń qobyzshylyq óneri de erekshe eken. Alaıda keńes ókimetiniń saıasaty qobyzdy eskiliktiń sarqynshaǵy dep baǵalaǵandyqtan, sol zamanda qobyzshylar shetqaqpaı kórdi. Sulýshash apaı bala kezinde ákesiniń ońasha bólmede qobyzyn qolyna alyp, bir áýenderge yńyldap qosylyp otyratynyn esine alady. Soǵystan keıingi jyldary, dúnıe qat kezde qolyna túsken aǵashtan kebeje, júksalǵysh, kereýet jasaıtyn sheberligi de bolǵan. Kópqyrly talant ıesi 1989 jyly dúnıe salǵan. Kózi tiri kezinde Málik qobyzshynyń muralary jınalmaǵan. Yrǵyz óńirindegi jyraýlyq-jyrshylyq ónerdiń úlgisindeı bolǵan san qyrly talant ıesiniń shákirtteri de belgisiz.
Aqtóbe oblysy