Baıaǵyda aýyl balasy úshin Almatynyń almasynan artyq bazarlyq bolmaıtyn. Alqyzyl túsi kóz arbap, ańqyǵan ısi aınalany alyp ketetin. Al tisiń tıgennen til úıirer tátti dámin aıtyp jetkize almaısyń.
Qazir dúken men dúńgirshek sórelerinde kókónis kóp. Jemis-jıdek jeterlik. Tórtkúl dúnıe tósinde ósip-óngenniń bári siresip tur. Qaltań kóterse, qalaǵanyńdy alasyń.
Bir «qyzyǵy», qysy-jazy satylatyn sol samsaǵan qııar, qyzanaqtardy aýzyńa amalsyzdan, qınala-qınala salasyń. Jylyjaıda jyldamdatyp kúmándi kúsheıtkishtermen ósirilgeni birden bilinedi. Dámsiz hám nársiz. Tabıǵı taza ónimdeı qaıdan bolsyn?
Nege ekenin qaıdam, bilimi az, biligi joqtyǵyna qaramaı, bılik tizginin ustaǵan keıbir kerdeń minez jastardy jańaǵy jylyjaıdyń jemisterine uqsatamyn. Bolmaǵan, tolmaǵan, biraq kún kózine shylym tutatqandaı kúı keship júrgen «shynjyrbalaq shubartós», kókeleri qoldaǵan ondaı oǵlandar búginde jyrtylyp-aıyrylady. Barǵan mekemelerin basa kóktep, óz óktemdigin ornatady. Mańaıyna ózinen óresi tómenderdi jınap, tájirıbeli tálimgerler esebindegi aqsaqal, kóksaqaldardan qutylýǵa asyǵady. О́ıtkeni mamandyǵynyń maıyn ishken maıtalmandar aldynda ózderin jaısyz sezinedi. Myqtylardyń mysy basady. Odan da órimdeı órenderden «komanda» jasaqtap, solardyń ortasynda aqylgóı bolǵandy qalaıdy.
Atam qazaq aıtqan: «Kókqarǵa k...ne qaramaı áýlıe aǵashtyń basyna qonady» dep.
Talaby tas jarǵan keıingi tolqyn ókilderiniń alamanda aty ozǵanyna qýanýymyz kerek. Al endi saýda-sattyqty jaılaǵan jańaǵy jylyjaıdyń jemisterindeı kóbeıip ketken kókqarǵalardy qaıtsek eken?..