Ejelden Quryltaı eldiktiń úlken máselesin sheshetin jıyn retinde belgili. О́ıtkeni osyndaı otyrys babalar dástúrin jańǵyrtýǵa jol ashyp, jańa ıdeıalardyń qalyptasýyna, qoǵamdaǵy keleli isterdiń júzege asýyna septigin tıgizip otyrǵan. Keıingi jyldary babalar ustanǵan osy joldy qaıta jańǵyrttyq.
Atyraýda ótken basqosýda elimizdi damytýǵa qatysty mańyzdy bastamalar kóterilip, jańa ıdeıalar qalyptasyp, jańa baǵyttar aıqyndalady. Quryltaıdyń ereksheligi de sol, aıtylǵan sóz aıtylǵan jerde qalmaıtynyn kórsetip keledi.
Ulytaýdaǵy Quryltaıda 42 bastama, Túrkistandaǵy otyrysta 100 usynys nazarǵa alyndy. Quryltaıdyń úshinshi basqosýynda Prezıdentimiz olardyń 80 paıyzdan astamy júzege asyrylǵanyn málimdedi. Sonyń ishinde erekshe atap óterligi, «Aýyl – el besigi» men Balalar kitaphanasyn qurý, Iаsaýı murajaıyna ulttyq mártebe berý, «Qazaqstannyń halyq jazýshysy» ataǵynyń qaıta oralǵany der edim.
Keshe ǵana Altyn Ordanyń baǵzy astanasynyń biri – Saraıshyqta, qazirgi Atyraýda úshinshi Quryltaı ótti. Munda da Quryltaı músheleri oı-pikirlerin ortaǵa salyp, memleketimizge paıdaly degen mańyzdy máselelerdi talqylady. Bul jolǵy Quryltaıda Prezıdent baıandamasynda nazarǵa ustaıtyn ózekti másele – eldi uıytatyn úlken rýhanı-mádenı jobalardy qolǵa alýmen qatar, halyqtyń bereke-birligine basa nazar aýdaryldy. Elge jón kórsetip, sózge toqtatatyn aǵa býyn, zııaly qaýym men qalamgerler, óner adamdarynyń el ishinde iritki týdyratyn emes, aýyzbirlikke úndeıtin sóz aıtyp, jol kórsetýi kerektigin atap ótti. «О́speıtin eldiń balasy bolyp, ónbeıtin daýdy qýmaıyq, el birligin nyǵaıtatyn áńgime aıtqan jón», dedi.
Memleket basshysy osy sózderdi Qazaqstan Jazýshylar odaǵynyń múshelerine qaratyp aıtqandaı áser etti. Byltyrdan beri qalamgerlerdiń qoǵamda qaıtadan mereıi ósip, jazǵan eńbekteri oqyrmanyna jetip, ortalaryna úlken oı salyp, halyqtyń nazaryn aýdaryp júr.
Prezıdent el nazarynda júrgen qazaq tiliniń bıznes pen tehnıkanyń tiline aınalyp kele jatqanyn, tilimizdiń aıasyn keńeıtý jolyn sózben emes, ispen atqarý keregin eskertip, byltyr qurylǵan «Qazaq tili Endowment» qoryna kómek qolyn sozǵan kásipkerlerine rızashylyq bildirdi.
Ulttyq quryltaıda Prezıdent árdaıym kitap isi, kitap oqý, kitaphana týraly ózekti oılaryn aıtyp otyrady. Túrkistanda balalar kitaphanasyn jasaýdy qolǵa alýdy tapsyrsa, bıyl Almaty men Astanada kóp uzamaı táýlik boıy jumys isteıtin kitaphanalar salynatynyn aıtyp qýantty. Túrkııa elinde stýdentterge arnalǵan Prezıdent kitaphanasyndaǵy korpýstarynyń aldynan tegin avtobýstar qatynaıdy eken. Túski, keshki asty tegin iship, túnge deıin qalyp izdenip oqyp júrgen jastar óz bilimin jetildirip, izdenip, bolashaqqa umtylady. Qaıtarda da kitaphana aldynda turǵan tegin avtobýsqa minip jataqhanasyna barady. Osyndaı úlgini Prezıdent bizge de qolǵa alý kerektigin aıtty.
«Kitap kúni» atty mereke belgilenetini de úlken minberden aıtyldy. Qoǵamda kitap oqý mádenıetin qalyptastyrýdy tapsyrdy. Qazir kitap oqymaıdy deıtinder kóp. Alaıda ata-analardyń balalarymen birge kitap dúkenderinde júrgenin jıi kóremin. «Aýyldan shyqqan mıllıoner», «Birtýar» kitaptarym oqyrmannan oń baǵasyn aldy. Sondyqtan balaǵa taza, aq kóńilmen shyǵarma jazsaq, oqıdy. Memleket basshysy Qazaqstannyń zaıyrly memleket ekenin basa aıtyp, eldiń jańarý qaǵıdattaryn usyndy.
Sáýle DOSJAN,
Ulttyq quryltaı múshesi