Sabaqtastyq pen birizdilik

Prezıdent Qasym-Jomart Toqaevtyń «Ádiletti memleket. Birtutas ult. Berekeli qoǵam» formýlasyndaǵy «Ádiletti memleket» túsinigi basty ıdeıa jáne negizgi element retinde ult pen qoǵam uǵymyn óz bo­ıyna sińirip, elimizdegi jatqan barlyq etnos­­­­ty uıystyryp, qoǵamdyq turaqtylyqty ornyq­ty­ratyn máıekke aınalyp otyr.

Prezıdent júrgizip otyrǵan memlekettik saıasat sabaqtastyq pen birizdilik qaǵıdatyna negiz­delgen. Ol elimizdiń bolashaqtaǵy beı­nesiniń negizgi sulbasyn «Ádiletti Qazaq­stan – Adal azamat – Ozyq oıly ult» degen bir-birinen bastaý alatyn jáne ózara tyǵyz baılanysty úshtaǵan uǵymy arqyly sıpattaıdy. Al Atyraýda ótken Ulttyq quryltaıdaǵy «Adal adam – Adal eńbek – Adal tabys» taqyrybyndaǵy sóılegen sózi joǵarydaǵy formýlany ári qaraı tereń saraptap, naqtylap, damyta tústi. Munda úshtaǵannyń «Adal azamat» uǵymy arnaıy qarastyrylyp, ádiletti memleket qurý úshin onyń azamattary da adal bolýy shart degen qorytyndy jasalǵan. О́ıtkeni arly adam ádiletsizdikke barmaıdy. Ol solaı bolǵanda ǵana qoǵam túlep, jańaryp ádil bolady degendi ańǵartady. Endeshe, adal qoǵamnyń bıligi de ádiletti saıasat júrgizýi kerek. Adal­dyqqa boı urǵan qoǵam músheleriniń qatary ósken saıyn ádil qoǵamnyń ornaý múmkindigi arta túsedi.

Ádiletti Qazaqstandy qurý úshin árbir otandasymyz Adal azamat bolýǵa umtylýy qajet. Ádiletti bıligi bar myqty memlekette ǵana halyqtyń áleýmettik-ekonomıkalyq jaǵdaıy jaqsy bolady. Sebebi ondaı qoǵam azamattarynyń boıynda, Abaı aıtqandaı, «Adal eńbekpen mal izdemek – arly adamnyń isi» sııaqty qasıettiń bar ekeni anyq. Qaı jerde bolsyn eńbektiń, kásiptiń jamany bolmaıdy. Tek bári zańdy bolýy kerek. Eń bastysy,  adal eńbek etý, adal jolmen tabys tabý, adal azamat bolý. Iаǵnı ol – adaldyq pen ádildikti bárinen bıik qoıatyn adam. Ondaı qoǵamda áleýmettik járdemaqyǵa qol jaıyp otyrmaıdy jáne masyldyqqa jol berilmeıdi. Mundaı ortada jemqorlyqqa jol berilmeıdi jáne el men onyń azamattarynyń múddesine saı sheshim qabyldanady. О́ıtkeni zań bar jerde tártip bolady. Osynyń barlyǵynyń negizinde izgilik pen adaldyq jatsa kerek. Endeshe, ádiletti Qazaqstan jáne Adal azamat uǵymdaryn el tiregi dep túsingen abzal.

Olaı bolsa, elimizdegi árbir azamat osy basty qundylyqtardy berik ustanýy kerek. Memleket basshysy usynyp otyrǵan «Adal azamat» uǵymy munyń bárin túgel qamtıtyny anyq. Bul túsiniktiń ádiletti Qazaqstan ıdeıa­symen úndestigin eskere otyryp, ony irgeli qundylyq retinde jas urpaqtyń sanasyna sińirýdiń mańyzy biz úshin óte zor. Sonda ǵana búkil qoǵamnyń sana-sezimin ózgertip, jańa qundylyqtar ómirlik qajettilikke aınalyp, qazaq halqy ozyq oıly ultqa aınalady. Árbir adam «Adal azamat» degen atqa laıyq bolyp, adal eńbegimen adal tabysqa jetetindeı jaǵdaı týǵan kezde elimizde ádil qoǵam ornaıdy. Osy úshtaǵandy Prezıdent ozyq ári tabys­ty elge aınalýdyń basty kilti dep esepteıdi. Ol uly Abaıdyń «Bes nárseden qashyq bol, bes nársege asyq bol» degen ósıetine súıene otyryp, qoǵamda bar keselderdi atap kórsetti. Ol ulttyń jańa sapasyn qalyptastyrý baǵytynda shyn má­ninde ozyq ult bolý úshin jaqsylyqqa umtylýmen qatar ulttyń jańa kelbetin aı­qyn­daıtyn negizgi qundylyqtardy da aıqyn­dap berdi.

Demek aldaǵy ýaqytta Qazaqstan atalǵan strategııalyq baǵdarynan aýytqymaı, myqty demokratııalyq ınstıtýttary jáne damyǵan quqyqtyq júıesi bar ádiletti memleket qurýdy jalǵastyrady. Qoǵamda zań men tártipti qatań saqtaý memlekettik saıasattyń tuǵyrly qaǵıdatyna aınalyp, barshaǵa jáne árbir adamǵa birdeı múmkindik beretin qoǵamdyq úrdis qalyptasady. Halyqtyń ál-aýqatyn arttyrýǵa baǵyttalǵan naqty sharalar qolǵa alynyp, keıingi bes jylda kóptegen mańyzdy bastama júzege asyryldy. Nátıjesinde, elimizde túbegeıli saıası ózgerister de boldy. Elimizdiń ósip-órkendeýine kedergi bolatyn jaman ádet, jaǵymsyz qylyq jáne qaýipti keselden qutylý turǵysynda da kóp jumys atqa­rylyp jatyr. Bul úderisti úrdiske aınaldyrýda adal azamattardyń alatyn orny erekshe bolmaq.