Ulttyq ulannyń áskerı qyzmetshileri sý tasqyny bolǵan aýdandarda táýlik boıy jumys istep jatyr. Olar jergilikti halyqty tabıǵı apat aımaqtarynan kóshirip, evakýasııalyq pýnktterge gýmanıtarlyq kómek jetkizýde. Sonymen qatar sý jaǵalaryn nyǵaıtý jumystaryn oryndap, qarǵyn sýdyń arnasyn burýmen shuǵyldanyp jatyr, dep habarlaıdy Egemen.kz.
О́tken táýlikte quqyqtyq tártip áskeriniń 6 áskerı bólimi jáne avıasııalyq bazasynyń áskerı qyzmetshileri Qazaqstannyń bes óńirinde – Aqtóbe, Batys Qazaqstan, Qaraǵandy, Pavlodar jáne Soltústik Qazaqstan oblystarynda sý tasqynyna qarsy is-sharalarǵa qatysty.
Ulttyq ulan ushqyshtary sý basqan eldi mekenderden turǵyndardy evakýasııalaýdy jalǵastyrýda. Ulttyq ulan avıasııasynyń eki MI-171E tikushaǵy Batys Qazaqstan jáne Aqtóbe oblystarynda mańyzdy mindetter atqaryp júr. Ulandyq avıasııa ekıpajy 28 adamdy qaýipsiz jerge kóshirdi, onyń 18-i balalar. Sondaı-aq 2 tonna kóleminde dári-dármekter men azyq-túlik jetkizildi.
Máselen, 6655 áskerı bólimniń áskerı qyzmetshileri sany 4 aýysymda 500 áskerı qyzmetshi (150 adamnan 1, 2 jáne 3 aýysym, 4 aýysym-50), sondaı – aq 17 birlik tehnıka 10 shaqyrym jerde ornalasqan Kırpıchnyı eldi mekeninde tonaýǵa jol bermeý jónindegi qyzmetti uıymdastyrýǵa tartyldy.
5517 áskerı bóliminiń (Oral q.) 60 áskerı qyzmetshisi men 2 tehnıka birligi Oral qalasyndaǵy Asan eldi mekeninde (budan ári – eldimeken) sý tasqynyna qarsy is-sharalardy ótkizýge qatysýdy jalǵastyrýda, bul meken turaqty ornalasý pýnktinen 7 shaqyrym jerde ornalasqan.
Elimizdiń shyǵysynda 5512 áskerı bóliminiń bólimsheleri (Pavlodar q.) sany 50 áskerı qyzmetshi jáne 3 tehnıka birligi 210 km qashyqtyqta Jalaýly eldi mekeni sý tasqynyna qarsy is-sharalardy ótkizýge qatysty.
6697 áskerı bóliminiń (Qostanaı q.) jeke quramy 100 áskerı qyzmetshi jáne 8 tehnıka birligi Jangeldın aýdany Taýsh kentindegi 530 km qashyqtyqta ornalasqan sý tasqynyna qarsy is-sharalardy ótkizýge qatysady.
- Jedel maqsattaǵy birinshi batalonnyń kúshimen qaýipti aýdandardy nyǵaıtý úshin 500-den astam qap qum daıyndaldy. Eń qaýipti ýchaskelerde nyǵaıtý jumystary júrgizilýde. Sonymen qatar sýdy aǵyzý úshin aǵyndar qurý jumystary júrgizilip jatyr. Bul saıajaılar men joldardy sý basýdyń aldyn alý úshin qajet, - dep atap ótti 6697 áskerı bóliminiń jedel maqsattaǵy rota komandıriniń orynbasary leıtenant Álisher Qaıroldınov.
5451 áskerı bóliminiń jeke quramy (Qaraǵandy q.) sany 50 áskerı qyzmetshi jáne 4 tehnıka, sý tasqynyna qarsy is-sharalardy ótkizýge qatysty. Olar 110 km qashyqtyqta ornalasqan Samarqand sý qoımasy aýdanynda qapshyqtardy daıyndaý jáne tóseý jolymen jasandy bóget turǵyzdy.
Qazaqstannyń soltústik óńirinde - Soltústik Qazaqstan oblysynyń Zarechnyı kentinde sý tasqynyna qarsy is-sharalardy ótkizýge 6637 (Petropavl q.) áskerı bóliminiń 50 áskerı qyzmetshi jáne eki tehnıka birligi bar ofıserleri, serjanttary men sarbazdary qatysady.
Jalpy, sý tasqyny bastalysymen 1228 áskerı qyzmetshi, 61 birlik avıa jáne avtomobıl tehnıkasy tartyldy. 832 adam evakýasııalandy, jalpy uzyndyǵy 8355 metr aryqtar tazartyldy, 53270 qapshyq tóseldi, dıversııalyq jumystar kezinde 250 kg ammonıt jumsaldy, gýmanıtarlyq kómek – 6800 kılogramm jetkizildi.