Osy ýaqytqa deıin Aqtóbe, Qostanaı, Pavlodar, Aqmola, Atyraý, Soltústik Qazaqstan oblystarynda 3 391 jeke turǵyn úı, 1059 saıajaı úıi, túrli maqsattaǵy 79 ǵımarat sý astynda qaldy. Bul týraly QR TJM Tótenshe jaǵdaılardy joıý Departamentiniń bastyǵy Qaharman Orazalın aıtty, dep habarlaıdy Egemen.kz OKQ saıtyna silteme jasap.
Onyń aıtýynsha 63 927 adam qutqaryldy jáne evakýasııalandy, onyń ishinde 45 múmkindigi shekteýli adam, 15 283 bala bar. Ýaqytsha ornalastyrý pýnktterine 13 328 adam jetkizildi, onyń 6 742-si bala. Olarmen psıhologtar jumys istep jatyr. Barlyq qajetti kómek kórsetiledi.
Sonymen qatar 10 068 bas aýyl sharýashylyǵy janýarlary qaýipsiz qashyqtyqqa aıdaldy.
Ushqyshtardyń sheberligi arqasynda 2 607 adam qutqaryldy, onyń ishinde 760 bala bar. Táýligine 243 adam qutqaryldy. Qutqarý operasııasy qıyn jaǵdaıda ótip, adamdardy úılerdiń tóbesinen evakýasııalaýǵa arnaıy tehnıka jáne lebedkalardy paıdalaný qajet bolǵan.
96 tonnadan astam gýmanıtarlyq júk jetkizilgen, 7 mln 300 tekshe metr erigen sý tartylǵan. 921 myńnan astam qapshyq jáne 970 myń tonna ınertti materıaldar tóselgen.
Avarııalyq-qutqarý jumystaryna 8789 adam, 1756 birlik tehnıka, 415 sý aıdaý jáne 65 júzý quraldary jumyldyryldy. 12 áýe kemesi jaýyngerlik kezekshilikte júr.
Elimizdiń 10 óńirinde ákimdikter jergilikti tótenshe jaǵdaı jarııalady. Senim telefonyna 973 qońyraý túsken. Barlyq óńirde táýlik boıy jedel shtabtar jumys istep tur.