Qulsary qalasyn qursaýǵa alǵan tasqynnyń habary estilisimen Mańǵystaýda qozǵalys bastaldy. Bul kórshi aǵaıynǵa kómek qolyn sozý kúbinisi edi.
Aldymen Mańǵystaýdyń Atyraý jaq shetinde ornalasqan Beıneý aýdanynyń Aqan Daýystyuly men Jandos Bektileý bastaǵan azamattary dereý jınalyp, qapshyq, kúrekterin alyp Qulsaryǵa attandy. Alaıda sý ekpini eńsertpeı qulsarylyqtar úshin evakýasııa jarııalandy. Sodan beıneýlikter shubyryp jolǵa shyǵyp qıyn jaǵdaıda qalǵan qulsarylyqtarǵa tegin taksı qyzmetin kórsetip, lek-lek adamdy Sarǵa men Beıneýge, Boranqulǵa tasyp aldy. Qıyn kezde psıhologter evakýasııalanǵandardyń qasynan tabyldy. Atalǵan aýyldarda mektep, sportzaldar shuǵyl jasaqtalyp, qulsarylyqtardy qabyldady, aýyl turǵyndary tamaq, kıim tasyp qyzmet etip júr.
Qulsary qalasynyń turǵyndaryna kómek berý úshin arnaıy esepshottar ashyp, túrli toptar quryldy. Jastar, eriktiler, blogerler, muǵalimder, dárigerler, sportshylar, polıseıler men teńiz jaıaý áskerleri halyqpen birge jumyldy.
Qazirgi tańda Qulsary qalasynyń 21 myń turǵyny Mańǵystaý oblysyna kelgen. Olardyń birqatary aǵaıyn-týystarynyń úıine ornalassa, birazy – arnaıy daıyndalǵan oryndarda. Aıaqasty mal-múlkin sýǵa aǵyzyp jiberip, bala-shaǵasyn arqalap jansaýǵalap qashý eshkimge ońaı emes. Osy jaǵdaıdy jaqsy túsingen mańǵystaýlyqtar Qulsarydan kelgen baýyrlarǵa qolda bar kómegin aıap jatqan joq. Aǵylyp jatqan azyq-túliktiń esebi joq, tipti iri qara mal soıyp qonaqasy berip, ystyq sorpa ishkizip, etpen qamtamasyz etip jatqan aýyldar da bar.
Kómekke bastamashy bolǵan Beıneý azamattarynyń jaqsy isin búkil Mańǵystaý jalǵastyrdy. Aqtaýdan, Qaraqııa, Munaıly, Túpqaraǵan aýdandarynan, Mańǵystaý aýdanynyń alys túkpirdegi aýyldarynan erikti túrde top-top jigitter attandy. Jańaózen qalasy ákimdiginiń qoldaýymen «О́zenmunaıgaz» mekemesi, «О́zenınvest», «О́zenjylý», «О́zenenergoservıs» MK, «KazPetroDrilling», «Burǵylaý», «MunaıFıldServıs», «QazGО́Z», «Ken-Qurylys Servıs» JShS jumysshylarynan quralǵan top bekitý jumystaryna qajetti 16 myń dana qap pen 400 kúrek, sý etik, qolǵaptardy tıegen 30-ǵa tarta tehnıkamen kómekke umtyldy. Sondaı-aq mańǵystaýlyqtar shuǵyl 3 tonna janarmaıdy Qulsaryǵa jetkizdi. Janarmaıdyń 1 tonnasyn «Suńqar» janarmaı beketi tegin berse, 1 tonna janarmaıdy azamattar jınap bergen, al 1 tonna halyqtan jıylǵan aqshaǵa satyp alynǵan.
Qulsarydan Mańǵystaýǵa kelgen 1 678 oqýshy óńirdegi bilim berý oryndaryna tirkeldi. Atap aıtsaq, Aqtaý qalasyna – 374 oqýshy, Beıneý aýdanyna – 1 098 oqýshy, Jańaózen qalasyna – 65 oqýshy, Qaraqııa aýdanyna – 38 oqýshy, Mańǵystaý aýdanyna – 41 oqýshy, Munaıly aýdanyna – 53 jáne Túpqaraǵan aýdanyna 9 oqýshy tirkelgen. Bul oqýshylardyń 351-i – mektepke, 326-y – kolledjderge, 992-i – týystarynyń jáne oblys turǵyndarynyń úıine, 9-y ata-analarymen birge qonaqúılerge ornalasqan.
Dárigerler evakýasııalanǵan turǵyndarǵa tegin qyzmet kórsetip jatyr. 2 áıel Aqtaý qalasyndaǵy perınataldyq ortalyqqa jiberilse, 6 áıel Beıneýdegi aýrýhananyń gınekologııa jáne patologııa bólimderine ornalastyryldy. Evakýasııalanǵandar arasynan qazirgi tańda 11 áıel bosansa, onyń altaýy Beıneý aýdandyq aýrýhanasynda bosandy. Jas bosanǵan analardyń birqataryn beıneýlik analar aýrýhanadan shyǵaryp alyp, sábıdiń qaljasyn jasap, besikke salyp kómek kórsetti.
Qulsarylyqtardy qabyldaýǵa Sh.Esenov atyndaǵy KMTÝ jaıly jataqhanasyn bólip qamqorlyq kórsetti, sondaı-aq «Beket ata» meshiti janyndaǵy medrese, jeke turǵyndar belsendi atsalysty. Beıneýlik Yrysbıke Ýrbısheva 3 otbasyny qabyldap, barlyq jaǵdaımen qamtamasyz etti.
Mańǵystaý oblysy