Ulttyq bank sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjelerin jarııalady. Osy jyldyń sáýir aıynda munaı baǵasy boıynsha ssenarıı sharttary kóp ózgeriske ushyraǵan joq. Respondentterdiń medıandyq kútýleri boıynsha 2024 jyly Brent markaly munaıdyń 1 barreli – ortasha eseppen 81 dollar, 2025 jáne 2026 jyldary 80 dollar deńgeıinde qalyptasady.
El ekonomıkasynyń ósimine qatysty 2024 jáne 2025 jyldarǵa arnalǵan boljam 4,5% jáne 5% deńgeıinde saqtalyp otyr. 2026 jylǵa arnalǵan boljam 4,5%-dan 4,7%-ǵa deıin birshama ósti.
2024 jylǵa arnalǵan ınflıasııaǵa qatysty boljam kóp ózgermeı, 8,4% boldy (aldyńǵy boljam – 8,5%). 2025 jylǵa arnalǵan boljam – 6,5%-dan 7%-ǵa deıin, 2026 jylǵa boljam 5,7%-dan 6%-ǵa deıin ósý jaǵyna qaraı qaıta qaraldy.
Sonymen qatar sarapshylar barlyq boljamdy kezeńde bazalyq mólsherlemeni joǵaryraq deńgeıde kútedi. 2024 jylǵa arnalǵan kútýler – 13,8%-dan 14%-ǵa deıin, 2025 jylǵa – 10,5%-dan 11,2%-ǵa deıin, 2026 jylǵa 9%-dan 9,8%-ǵa ósti.
Saýalnamaǵa el aýmaǵynda makroekonomıkalyq kórsetkishterdi taldaýmen jáne boljaýmen aınalysatyn 11 uıym qatysty. Respondentterdiń qataryna naryqtyń kásibı qatysýshylary, zertteý ınstıtýttary, halyqaralyq uıymdar men reıtıngtik agenttikter kiredi.