Májilis depýtattarynyń elimizdiń sý basqan óńirlerine sapary jalǵasyp jatyr. Edil Jańbyrshın, Abzal Quspan, Rınat Zaıtov, Maqsat Tolyqbaı, Nartaı Sársenǵalıev Atyraý qalasynda, Mahambet aýdany men Qulsary qalasynda boldy.
Sapar barysynda májilismender Atyraý oblysynda sý tasqynyn aldyn alýǵa atsalysyp, sý basqan eldi mekenderdiń turǵyndarymen kezdesip, zardap shekken aýdandar men aýyldardy aralady.
Jaıyq ózeninen saqtanyp, bóget salyp jatqan Almaly aýylynyń turǵyndarymen kezdesýde Nartaı Sársenǵalıev basty maqsat eldi mekenderdi tasqyn sýdan aman alyp qalý ekenine erekshe nazar aýdardy.
– Jaıyq ózeni kúnine 20 santımetrge kóterilip jatyr. Qazir munda Almalyny aralǵa aınaldyryp, bógetpen qorshap jatyr. Sýdyń qatty soqqany sonsha, tutas tas qabyrǵalardy opyryp tastaǵan. Mahambet aýdanyna da at basyn tiredik. Jaıyq aldymen osynda soǵady. Mahambet aýdanynda jalpy 21 eldi meken bar. Sonyń ishindegi 17 aýyl Jaıyqtyń týra janynda tur, – dedi Nartaı Sársenǵalıev.
Májilis depýtaty Maqsat Tolyqbaı Atyraýdyń biraz bóligin saqtap qalýǵa múmkindik bar ekenin aıtyp, Reseıden úlken nópirmen sý kele jatqanyna alańdaýshylyq bildirdi.
– Batys Qazaqstan oblysyna da qıyn bolaıyn dep tur. Eshkimge ońaı emes. Qazir Atyraýdy aınaldyra qorshaıtyn 21 shaqyrym damba salynyp jatyr. Ýaqyt az. Oǵan qosa Jaıyq ózeni Atyraýdyń ishimen aǵyp ótedi. Kásipkerler de qolushyn sozyp, tehnıkasyna deıin berip jatyr. Áskerıler jumyldyryldy. О́z qaltasynan aqsha shyǵarǵan áriptes depýtattarǵa, kún-tún demeı kómek qolyn sozyp jatqan Atyraý, Almaly, Isataı, Mahambet jáne taǵy basqa aýyl turǵyndaryna alǵysymyz sheksiz. «Amanat» partııasynyń da uıymdastyrýymen azyq-túlik, qap, qosymsha jumys kúshi, tehnıka kelip jatyr, – dedi Maqsat Tolyqbaı.
Qulsary qalasynyń turǵyndarymen kezdesýde Edil Jańbyrshın jalǵan aqparatqa ermeı, bul qıyn jaǵdaıdan birigip shyǵý kerektigine basa mán berdi. Sonymen qatar depýtattar sý basqan birneshe shaǵyn aýdandy aralap, jurttyń talap-tilegin Atyraý oblysynyń ákimine jetkizdi.
– Arnaıy komıssııa jergilikti belsendilerdi kirgizip, sapaly jumys atqarýy kerek. Komıssııa turǵyn úılerdi sý ketkennen keıin emes, qazirgi jaǵdaıyn eskerip baǵalaýǵa tıis, – dedi Edil Jańbyrshın.
Aıta ketý kerek, tabıǵı apat saldarynan Qulsaryda 2 400 úı sý astynda qalǵan, onyń 200-den astamy qulaǵan. Búgingi kúni qalada sýdyń deńgeıi 60 sm-ge deıin tómendegen. Qazir qalada sý basqan úılerdi qurǵatý jumystary júrip jatyr. Bul jumysqa arnaıy 58 tehnıka jáne 50 adam jumyldyrylǵan. Búgingi kúnge deıin 7 800 tekshe metr sý shyǵarylǵan.
Sondaı-aq depýtat Ekaterına Smyshlıaeva Qostanaı oblysy Qarasý aýdanynyń turǵyndaryn evakýasııalaýǵa qatysty. Munda 39 eldi mekenniń 8-in sý basqan. Al Qaramyrza aýylynda 33 aýla men 53 turǵyn úı zaqymdanǵan. Jergilikti turǵyndarmen kezdesýde májilismen sý tasqynynan zardap shekkender turǵyndarǵa qandaı ótemaqy tólenetinin túsindirdi. Ol úshin arnaıy komıssııa shyǵyndy tolyq esepteıdi. Turǵyn úıleri búlingen azamattardyń tizimin jergilikti ákimdikter jasaıdy.
Búginde Qostanaı oblysynda sý tasqyny basylyp keledi. О́ńirde Qarasý jáne Qostanaı aýdandarynyń alty eldi mekeninde, sondaı-aq oblys ortalyǵynda 150-den asa jeke turǵyn úı áli de sý basý aýmaǵynda qalyp otyr.
Depýtat Vera Kım Pavlodar oblysyndaǵy jumysyn jalǵastyrýda. Ol Atameken jáne Kenjekól aýylyndaǵy bógetterdiń, bekinister men jaǵalaýlardyń tehnıkalyq jaǵdaıymen tanysty.
Munda sý tasqynynyń birinshi kezeńi apatsyz ótti. Ertis ózeniniń boıynda ornalasqan Joǵary Ertis sý qoımalarynan Shyǵys Qazaqstan oblysyna sýdyń ekinshi tolqyny kelýi múmkin. Tasqynnyń aldyn alý úshin jaǵalaýlardy nyǵaıtýǵa topyraq ákelinip jatyr. Atamekenge 2 myń tonna, Kenjekólge 6,5 myń tonna qum jetkizildi.
Sarapshylarmen jáne vedomstvolyq qurylymdardyń ókilderimen áńgimelesý barysynda Vera Kım eskertý júıelerin tekserý, evakýasııalaý oryndaryn anyqtaý jáne jaǵdaıdy únemi baqylaýda ustaý qajettigine nazar aýdardy. Qazir qutqarýshylar eldi mekenderde táýlik boıy kezekshilik etip, mamandar bekinisterdi tekserip jatyr.