Elordada kórnekti geolog-akademık Qanysh Sátbaev týraly tolyqmetrli fılmniń arnaıy kórsetilimi ótti. Kórkem týyndyda ǵalymnyń ómiri men eńbek joly baıandalady. Sonymen qatar el basyna kún týǵan náýbet kezderindegi azamattyq beınesi kórsetiledi. «Qazaqstan» teleradıokorporasııasy túsirgen «Qanysh. Qazyna» telehıkaıasynyń negizindegi tolyqmetrli fılmdi, endi elimizdiń barlyq kınoteatrynan tamashalaýǵa bolady.
Kórsetilimniń alǵashqy quttyqtaý sózin Mádenıet jáne aqparat mınıstrligi Mádenıet komıtetiniń tóraǵasy Kúmis Seıitova jetkizdi. Buǵan qosa, memleket tarapynan aldaǵy elýden asa iri mádenı jobalardy iske asyrý josparlanyp otyrǵanyn aıtty. «Qanysh» tarıhı fılmi de osy aýqymdy is-sharalardyń – biri.
Fılm rejısseri Erlan Nurmuhamedovtiń aıtýynsha, basty róldi oınaıtyn akterdi tańdaý ońaıǵa soqpaǵan. «Qanysh san qyrly tulǵa. Onyń ǵalymdyǵymen qatar sheshendigi, ánshiligi de – bir tóbe. Al tarıhı, ádebı muramyzǵa qosqan úlesi orasan. Sondyqtan biz de Sátbaev sáýlelerin jan-jaqty kórsetetin akterdi izdedik. Áset Esjan – bizdiń eń sátti tańdaýymyz», dedi ol.
«Qanyshty somdaý – maǵan jaýapkershilik júktedi. Alyp tulǵany memlekettik qaıratker, kórnekti ǵalym dep tanyǵanymen, ony eń áýeli ultyn sheksiz súıgen qazaqtyń perzenti etip kórsetkim keldi. Osy oraıda Qanysh týraly qısapsyz eńbek qaldyrǵan jazýshy Medeý Sárseke aǵamyzdyń rýhyna taǵzym etemiz», deıdi Áset Esjan.
Fılm prodıýsseri Aıgúl Baıbek kórkem týyndynyń jas býynǵa ıgi áserin aıta kelip, qoǵamnyń jaqsylyqqa bet burysyna yqpal etetinin jetkizdi. Buǵan qosa tarıhı fılmdi qarjylaı qoldaǵan demeýshilerge rızashylyǵyn bildirdi. Aıta keteıik, serıal men fılmdi jasaýǵa «Eurasian Resources Group» pen «Qazaqmys» holdıngi qarjylyq qoldaý kórsetken bolatyn.
Buǵan deıin kórkem týyndy birneshe halyqaralyq baıqaýda jeńimpaz atanǵan. Atap aıtsaq, 2022 jyly Argentınanyń Býenos-Aıres qalasynda ótken festıvalda «Úzdik fılm» júldesin jeńip alsa, byltyr «Úzdik azııalyq kórkem fılm», «Úzdik konsepsııa», «Qorshaǵan orta týraly úzdik kórkem fılm» syndy úsh birdeı atalymmen marapattaldy.