Otandyq ǵalymdarymyz ben ónertapqyshtarymyzdyń jetistigi ýaqyt ótken saıyn eselenip keledi. Ásirese, sońǵy kezderi álem nazaryna usynylǵan tyń jobalar men aıtýly jańalyqtardyń mán-mańyzy erekshe. Mine, osynaý irgeli isterdiń qatary taǵy bir ǵylymı jobamen tolyǵyp otyr. Naqtylaı aıtqanda, qazaqstandyq hımık Erlan Dosjanov munaıdan lastanǵan jerdi tazartýdyń ádisin oılap taýyp, bul jańalyǵyn «Eýrazııanyń úzdik jas ǵalymy» saıysynda sátti qorǵap shyqty. Osylaısha, TMD elderinen kelgen júzden astam ǵalym qatysqan konkýrsta otandasymyzdyń jumysy mamandardyń ystyq yqylasyna bólenip, «Adam ekologııasy» nomınasııasynda úzdik dep tanyldy.
Munaıdan lastanǵan topyraq qabatyn mıkroaǵzalardy qoldaný arqyly tazartý tásilin usynǵan ǵalym óz jańalyǵynyń mánisin «Bul ádis arqyly topyraqty 73-90 paıyzǵa deıin tazartýǵa bolady. Kómirsýtekter totyǵyp, sońynda sý men kómirqyshqyl gazy bólinip shyǵady», – dep túsindirdi.
Aıta ketelik, Erlan Dosjanov – PHD doktory, Janý problemalary ınstıtýtynyń ǵylymı qyzmetkeri, sondaı-aq, topyraqtyń lastanýy sebebin bıohımııalyq ádispen tabý jobasynyń avtory.
Joldybaı BAZAR,
«Egemen Qazaqstan».