Taǵdyrdyń talaıymen ózge memleketterde ómir súrip jatqan qandastarymyzdyń elge oralýyn qamtamasyz etýge baılanysty atqarylyp jatqan jumystar nátıjesiz emes. Máselen, 2014 jyldyń qańtar-qyrkúıek aılary aralyǵynda shet elderde turatyn etnostyq qazaqtardyń arasynan 3,5 myńǵa jýyq otbasy Qazaqstanǵa kóship kelip qonystanǵan.
Memleket basshysy Nursultan Nazarbaevtyń bastamasymen qolǵa alynyp, qoǵamymyzdyń kún tártibine shyǵarylǵan mán-mańyzy joǵary, eldikke únder jasampaz isterdiń biri ári biregeıi retinde shetelderdegi qazaqtardy elge shaqyryp, olarǵa múmkindiginshe jaǵdaı jasalynyp otyrǵanyn aıtýǵa bolady. Osynaý kóńil tebirenter jumystardyń myna ózgermeli, almaǵaıyp zamanda eshteńege jaltaqtamaı, baýyryn izdep, qandasyn túgeldeýge túbegeıli bet burǵan qazaq jurtynyń arman-tilegimen ushtasyp jatqanyn sezine bilgenimiz jón.
Shettegi qandastarymyzdyń qara shańyraq – Qazaqstanǵa kelýi 2014 jyly da jalǵasyn tapty. Elimiz álemdi oılandyryp, talaıdy tyǵyryqqa tiregen qarjylyq daǵdarystardan týyndaýy yqtımal jaǵdaılarǵa alańdamaı, oralman qaýymyn bar múmkindiginshe qarsy aldy. Densaýlyq saqtaý jáne áleýmettik damý mınıstrligi taratqan sońǵy málimetke qaraǵanda, byltyr shekara asyp 3 347 (8 359 adam) oralman otbasy kelipti. Bulardy genderlik quramy boıynsha kórseter bolsaq, er-azamattar – 3 438, áıelder – 3 323, balalar – 1 598.
Budan bólek, atalǵan mınıstrliktiń dereginshe, eńbekke jaramdy adamdar – 4 768, zeınetkerlik jastaǵylar – 395 bolyp otyr. Osy arada nazar aýdara keter jaıt, elge kelgen oralmandardyń arasynda 368 adam joǵary bilimdi bolsa, 869-y orta kásibı bilimi bar jandar, al jalpy orta bilimdileri – 2 592.
Qazaq elge eldiń qosylýyn qutqa balaǵan. Endeshe, alystaǵy aǵaıynnyń oralýyn jaqsylyqqa joryp, memleketimizdiń abyroıyn asyrar osynaý jasampaz ister qut-berekemizdiń negizi bola bersin deıik.
Joldybaı BAZAR,
«Egemen Qazaqstan».