Aksıonerlik qoǵam óńirdegi eń iri kásiporynnyń sanatynda. Sonaý 1959 jyldan beri úzbeı jumys istep kele jatyr. Avıasııaǵa qajetti tehnıka toraptary men árqıly agregattardy daıyndaýǵa mamandanǵan. Bir sózben aıtqanda, qorǵanys salasynyń suranysyn oryndaıdy.
О́tpeli kezeńde zaýyt birqatar qıynshylyqty basynan keshirse de, joǵary bilikti mamandardy, óndiristik ınfraqurylymdy, ózderi shyǵaratyn ónimniń negizin saqtap qaldy. Qazir zaman talabyna saı iri ınvestısııalyq jobalardy jáne qyzmettiń jańa baǵyttaryn tııanaqty ıgerip otyr. О́tken sharýany taldaı ketetin bolsaq, 2005 jyly «Krauss Maffei» nemis qurylǵysyn óndiriste paıdalaný arqyly dıametri 10 mm-den 250 mm-ge deıingi polıetılen qubyrlardy ıgerýge arnalǵan ınvestısııalyq jobany qolǵa alǵan bolatyn.
Osy jobany ıgerý túptep kelgende kásiporynǵa tabys ákelip qana qoıǵan joq, eldi mekenderdi taza sýmen qamtýǵa aıta qalarlyqtaı septigin tıgizdi. Qubyr myqty ári uzaq ýaqytqa shydaıtyn buıym bolyp shyqty. Dıametri 110-nan 1 000 mm-ge deıingi polıetılen qubyrlaryn óndirý áli de jalǵasyp jatyr. Zaýyt basshylarynyń aıtýynsha, sapaly qubyrǵa tapsyrys ta jıi túsetin kórinedi. Kásiporyn jylyna myń tonnaǵa deıin gaz salasynda paıdalanylatyn qurylǵylar quıý ınvestısııalyq jobasyn júzege asyrdy.
– Tapsyrma burynǵy Indýstrııa jáne jańa tehnologııalar mınıstrliginiń sheshimi boıynsha ónerkásiptiń óńirlik kartasyna engizilgen halyqaralyq joba bolatyn, – deıdi zaýyt basshysy Qaırat Qalmanbaev, – Keıin kásiporynda jeke qorǵanys quraldaryn daıyndaý sehy ashyldy. Elimizdiń kúshtik qurylymdary úshin oq ótkizbeıtin jıletter, soqqydan saqtap qalatyn berik, myqty qalqandar shyǵara bastadyq. Únemi izdenis ústindegi ujym 2017 jyldan bastap avtomobıl krandaryn qurastyrý sehyn iske qosty. Sharapatty sharýa munymen de shektelip qalǵan joq. Elektr qýatymen júretin múgedekter arbasyn daıyndaý da jaǵymdy jańalyqtyń biri boldy. Ánsheıin arba ǵana emes, qarǵa adym jer muń bolǵan qanshama adamnyń alǵysyn alatyn ilkimdi is.
Kásiporyn baılanys jelisiniń bólshekterin, árqıly medısınalyq jabdyqtar, órt sóndirý quraldaryn da shyǵarady. Osynshama sharýany 483 adamnan quralǵan ujym atqaryp jatyr. Shyntýaıtynda, aksıonerlik qoǵam elimizdegi mashına jasaý salasynyń úzdikteriniń biri ekendigin de aıta ketýimiz kerek. Kásiporyndy alǵa súırep kele jatqan da uıymshyl, on saýsaǵynan óner tamǵan osy ujym. Ujym músheleri 2023-2025 jyldarǵa arnalǵan ujymdyq shart boıynsha jumys isteıdi. Bir aıta keterligi, eńbekti qorǵaýǵa tıisti kóńil bólinip otyr. Ár jyl saıyn kásiporyn qyzmetkerlerin medısınalyq saqtandyrýǵa kádimgideı talap qoıylady. Qyzmetkerler tolyqtaı medısınalyq tekserýden ótkiziledi. Eń bastysy, densaýlyqqa zııandy eńbek jaǵdaıynda jumys isteıtinderge tolymdy ótemaqy tólenedi. Jumysshylarǵa densaýlyqtaryna keler zııandy sál de bolsa azaıtý úshin sút, sabyn beriledi. Barlyq óndiristik ýchaskede alǵashqy kómek kórsetý úshin qajetti medısınalyq qobdıshalar qoıylǵan. Tolymdy jabdyqtalǵan densaýlyq saqtaý pýnkti jumys isteıdi.
Ujymdyq shartqa sáıkes eńbek jaǵdaıyn jaqsartýǵa, jumysshylardyń densaýlyǵyn qorǵaýǵa, jalaqyny ulǵaıtýǵa, eńbekti qorǵaý júıesin jańǵyrtýǵa jeńildikter men ótemaqylardyń barlyq túrin tańdaýǵa, jalaqyny ındeksteýge, jumysshylarynyń materıaldyq jaǵdaıyn jaqsartýǵa baǵyttalǵan basqa da is-sharalar qolǵa alynyp otyr. Náresteli bolǵan analarǵa materıaldyq kómek kórsetiledi. Bala kútimine baılanysty demalysta júrgenderge eń tómengi jalaqy tólenip turady. Ujym múshelerine saýyqtyrý oryndaryna joldama beriledi. Joldama qunynyń 80 paıyzyn jumys berýshi tóleıdi.
– Kásiporyn jalpy jumysshylardyń jaǵdaıyn oılap kómek kórsetý máselesine kelgende táp-táýir jumys istep otyr, – deıdi №6 sehtyń sheberi Meıram Táshenov. – Eńbek demalysyna shyqqan kezde eki aılyq eńbekaqy mólsherinde emdelý úshin járdemaqy beriledi. Kópbalaly otbasylar men múmkindigi shekteýli balalardy tárbıelep otyrǵandarǵa materıaldyq kómek kórsetiledi. Áleýmettik jaǵynan az qamtamasyz etilgen otbasylardyń oqýshy balalaryna ár jyl saıyn oqý jyly qarsańynda kerek-jaraqtaryn satyp áperedi. Osynyń barlyǵy qarapaıym eńbek adamdaryna kórsetilip otyrǵan qamqorlyq. Bálkim, osyndaı janashyrlyqtyń barynan jastar qulaǵdar bolǵandyqtan shyǵar, bizdiń ujymda eńbek etýge tilek bildirýshiler az emes.
Sheberdiń aıtýyna qaraǵanda, kásiporynda ózindik eńbek dástúri qalyptasqan. Jumysqa ornalasqan jastardy baýyryna tartyp, eńbekke baýlý, úıretý úrdisi jap-jaqsy. Saıyp kelgende, kásibı sheberlerdiń ósýin úzdiksiz qamtamasyz etý arqyly kásiporyn qyzmetiniń tıimdiligin arttyrýǵa meılinshe mán berilip otyr. Jumysshylardyń júktelgen mindetti tyńǵylyqty oryndaýy da qadaǵalanady. Qadaǵalanyp qana qoımaı, kásiporynda biliktilikti jetildirý jaqsy qoıylǵan. Jyl saıyn oqytý jospary túziledi. Josparǵa sáıkes jumysshylar biliktilikti jetildirý kýrsynan ótedi. Tutas ujymnyń sheberligi arta túsedi. Kadrmen jumys isteý jyl ótken saıyn jaqsaryp, ishki kadr rezerviniń tizimi bekitilgen. Jańadan qabyldanǵan qyzmetkerdi oqytyp úırete otyryp, yqtımal qatelikterdiń sany meılinshe azaıa túsedi.
Zaýytta jumysshy mamandyǵyn qalaǵan jastardy eńbekke tartý úshin oqýshylardyń jumys kásibin oqytý oń jolǵa qoıylǵan. Belgili bir mamandyqtardy ıgerý úshin tálimgerler taǵaıyndalady.
Sútteı uıyǵan ujymda bekem birlik bar. Al birligi bar jerdiń tirligi de ómirsheń bolmaq.
Kókshetaý