AQTО́BE. 6 qańtar. «Aqtóbe-Astrahan» tas joly boıynda oryn alǵan jol-kólik oqıǵasynan 4 adam qaza tapty. Bul týraly egemen.kz tilshisi habarlady.
Aqtóbe qalasynan Alǵa qalasyna qaraı baǵyt alǵan «Toıota Corolla» avtokóliginiń 24 jastaǵy júrgizýshisi kólik tizginine ıe bola almaı joldyń qarsy baǵytyna shyǵyp ketip, Temir aýdanynyń 42-jastaǵy turǵyny basqarǵan «Opel-Vektra» kóligine soqtyǵysty. Oblystyq ishki ister departamenti baspasóz qyzmetiniń aqpary boıynsha, jol-kólik apaty saldarynan «Opel-Vektra» kóliginiń júrgizýshisi men 52-jastaǵy jolaýshysy jáne «Toıota Corolla» kóliginiń 50 jáne 52 jastaǵy jolaýshylary alǵan jaraqattarynan oqıǵa ornynda kóz jumǵan. «Opel-Vektra» kóliginiń 4 jolaýshysy (bireýi bir jarym jasar búldirshin) jáne «Toıotanyń» 2 jolaýshysy túrli jaraqattarmen Aqtóbe qalasynyń aýrýhanalaryna jetkizildi.
Qazirgi tańda jol-kólik apatynyń oryn alý sebebi men saldaryn anyqtaý maqsatynda Qylmystyq kodekstiń 345 baby 4 tarmaǵyna sáıkes, ıaǵnı eki nemese odan kóp adamnyń ólimine ákelgen jol júrý erejelerin buzý deregimen qylmystyq is qozǵalyp, birqatar saraptamalar taǵaıyndaldy.
Satybaldy Sáýirbaı.
Derek: egemen.kz.
Sýret: total.kz.