О́tken jyldyń sońynda el gazeti «Egemen Qazaqstannyń» 95 jastyń tórine kóterilgen toıy atalǵanynan oqyrman qaýym habardar. Mereıtoı qarsańynda basylymnyń bir top qyzmetkerleri men ardagerleriniń eńbegi memlekettik nagradalarmen marapattalǵan bolatyn. Jańa jyldyń alǵashqy jumys kúnderinde taǵy bir jaqsy jańalyqtyń habary jetti: «Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek Abdrahmanov Táýelsiz Memleketter Dostastyǵy Parlamentaralyq Assambleıasy Keńesiniń sheshimimen «Baspasóz ben aqparatty damytýǵa sińirgen eńbegi úshin» («Za zaslýgı v razvıtıı pechatı ı ınformasıı») belgisimen marapattaldy. Parlamentaralyq Assambleıanyń Tóraıymy – Reseı Federasııasy Federaldyq jınalysynyń Federasııa Keńesiniń Tóraıymy Valentına Matvıenko qol qoıǵan №10 kýálik pen belgi S.Abdrahmanovqa keshe Qazaqstan Respýblıkasy Parlamentiniń Senatynda tabys etildi. Nagradany tapsyrǵan Senat Tóraǵasy Qasym-Jomart Toqaev osy marapatty ıelengen tuńǵysh qazaqstandyq jýrnalıst bolyp tabylatyn S.Abdrahmanovty eńbeginiń halyqaralyq deńgeıde bıik baǵalanýymen quttyqtap, belgili pýblısıstiń jarııalanymdary Táýelsiz Memleketter Dostastyǵy elderiniń arasyndaǵy yntymaqtastyqty nyǵaıtýǵa septesetinin atap ótti.
Parlamentaralyq Assambleıa TMD-ǵa múshe memleketterdiń parlamenttik delegasııalarynan quralady. Onyń qyzmetin TMD Parlamentaralyq Assambleıasynyń Keńesi uıymdastyryp, úılestirip otyrady. PAA-nyń basty mindeti – TMD elderiniń zańnamalaryn qalyptastyrý jáne jaqyndastyrý. Qyzmeti barlyq memleketterdiń quqyqtaryn qurmetteýge qurylǵan, búginde bedeldi halyqaralyq qurylymǵa aınalǵan TMD Parlamentaralyq Assambleıasynyń san-salaly jumysy S.Abdrahmanov basshylyq etetin «Egemen Qazaqstan» gazetiniń betterinde de, jýrnalıstiń óz maqalalary men reportajdarynda da tıisti deńgeıde kórsetilip keledi. Olardyń kóbi Qazaqstan Respýblıkasy Parlamenti Senatynyń Tóraǵasy Qasym-Jomart Toqaevtyń alǵysózimen jaryq kórgen «Qashaǵan quryqtaǵan Qazaqstan» jınaǵynda toptastyrylǵan bolatyn.
«Egemen-aqparat».
Sýretti túsirgen
Amanqul DÚISENBAEV.