Qazaqstan halqy Assambleıasynyń halyqtyq ınstıtýt retindegi birden-bir kórinisi retinde «Birlik. Jasampazdyq. О́rleý» atty XXXIII sessııasynyń onlaın formatta ótýin aıtýǵa bolady. Bul – QHA belsendileri men volonterleriniń jergilikti jumysyn toqtatpaýǵa jáne mańyzdy saıası is-sharany iskerlik jáne jumys rejiminde ótkizýge múmkindik berdi.
Alqaly jıynda Prezıdent Qasym-Jomart Toqaev elimizdiń myzǵymas birligi, halqymyzdyń yntymaǵy men joǵary azamattyq jaýapkershiligi osy qıyn kúnderde aıqyn kóringenin atap ótti. Rasymen de, dál osy qıyn-qystaý tusta Abaı atamyz aıtqandaı, «Adamzattyń bárin súı» dep meńzegen baýyrmaldyq uǵymy, qazaqtyń baǵzydan kele jatqan erekshe qasıeti. Eldegi tótenshe jaǵdaı sol baýyrmaldyqty erekshe kórsetken kezeń boldy.
О́ńir-óńirlerge qanshama tilshiler baryp, naqty, resmı aqparattar taratyp jatyr. Biz erikti bolyp, sol aımaqtarǵa tabanymyz tımese de, basty mıssııamyz – resmı aqparat taratý.
Árıne, halyqqa ońaı bolyp otyrǵan joq. Olardyń renishi oryndy. Bir jaǵynan, myna kúrdeli kezeńde qaı salada olqylyqtar baryn, qaı salany áli de ilgeriletý kerek ekenin aıqyndadyq. Muny Prezıdent te qadap aıtty. Máselen, respýblıka boıynsha gıdrologııa salasynda mamandar tapshy. Mamandar sabaqtastyǵy degen úzilip bara jatqandyǵyn, osy salanyń zeınettegi aǵa býyn ókilderi de aıtyp jatyr. Qysqasy, sala mamandaryn ázirleý, gıdrologııalyq qyzmetti jandandyrý, bógetterdi salý máseleleri qurǵaq sóz retinde qalmaı, óz nátıjesin beretinine senim mol.
Sessııada memlekettik til mártebesi de tysqary qalmady. Sebebi qoǵamda qazaqshaǵa shorqaqtaý keletin otandastarymyz áli de barshylyq. Dese de tendensııa boıynsha, ásirese ózge etnos ókilderi arasynda qazaq tiline qyzyǵatyndar, óz betinshe oqyp, meńgerip jatqandar kóp. Oǵan Ulttyq arnanyń «Shańyraq» baǵdarlamasy barysynda kóz jetkizdim. Úsh maýsymda 60 shaqty baǵdarlama túsirildi. Muny respýblıkanyń ár azamaty teledıdarǵa telmire otyryp kórmese de, áleýmettik jeliler arqyly baqylaıdy. Ásirese YouTube platformasynda qaralymy jetip artylady. Jobanyń basty mıssııasy – etnos ókilderin kórsetip, memlekettik ıdeologııany, otbasylyq qundylyqtardy dáripteý.
Qazir etnos ókilderi, ásirese jastar arasynda memlekettik tildi óz betinshe úırenip, qurǵaq sóz retinde emes, júrek súzgisinen ótkizip, qazaq halqyna alǵysyn bildirip júrgen azamattar jeterlik. Qazaq mádenıetine, salt-dástúrine sińgen etnos ókilderi óte kóp. Bizdiń maqsatymyz – tatýlyqty tý etetin jandardy kórermenge, ár otandasymyzǵa kórsetý.
Alla GAVRINA,
«Qazaqstan» RTRK AQ «Tańsholpan» baǵdarlamasynyń júrgizýshisi