Birqatar óńirdegi sý tasqynyna baılanysty Prezıdent Assambleıanyń kezekti otyrysyn onlaın formatta ótkizýge sheshim qabyldady. Sessııada Memleket basshysy QHA-nyń mańyzdylyǵy men rólin, ásirese syndarly kezeńdegi Qazaqstan halqynyń yntymaǵy men birligin taǵy da atap ótti.
Tasqyn bastalǵan alǵashqy kúnnen-aq Assambleıa stıhııalyq qubylystarmen kúrestiń basy-qasynda belsendi qyzmet atqaryp jatyr. Qaıyrymdylyq jáne gýmanıtarlyq kómekterdi jınaý, evakýasııalaýdy uıymdastyrý jáne azamattardy habardar etýmen aınalysatyn 43 myń qazaqstandyq eriktiniń 12 myńy – etnomádenı birlestikterdiń múshesi. «Júrekten – júrekke» aksııasy aıasynda óńirlerge 1 500 tonnadan astam azyq-túlik pen eń qajetti taýarlar jóneltildi.
«Assambleıa – keıbir adamdar aıtyp júrgendeı, jasandy uıym emes. Assambleıa – el birligin is júzinde ornyqtyra túsetin tıimdi qurylym. Búginde bul – konstıtýsııalyq mártebesi bar mańyzdy qoǵamdyq organ», dedi Prezıdent. Sondaı-aq barshamyzdyń kúsh-jigerimizdi biriktirýge tıis birqatar mindetti atady.
Prezıdent balalardy irgeli qundylyqtar negizinde tárbıeleýge basa nazar aýdarý qajet ekenin atap ótti. «Jastarymyz árdaıym alǵa umtylýy qajet. Olardyń dúnıetanymy ótkendi, búgindi jáne bolashaqty birtutas ultymyzdyń esh bólinbeıtin ortaq murasy retinde emosııasyz, saıası astarsyz shynaıy qabyldaýǵa negizdelýi óte mańyzdy», dedi Memleket basshysy.
Sondaı-aq ol otandastarymyzdyń ózgelerdiń teris yqpalyna túspeı, óz ıdeologııamyzǵa súıenýi kerektigine nazar aýdardy. Ideologııanyń negizi – el táýelsizdigi.
Birlik memlekettik saıasattyń negizgi baǵyty jáne ulttyq biregeılikti nyǵaıtýdyń qýatty faktory bolyp qala beredi. Al Otannyń ortaq ekenin seziný – jalpy azamattyq sananyń negizi. Basym baǵyttardyń qatarynda qoǵamda etnostyq erekshelik negizinde oqshaýlanýdyń kez kelgen túrine, arandatýlarǵa jáne azamattardy mádenı, tildik, etnostyq nemese dinı belgileri boıynsha kemsitý áreketterine tózbeý atmosferasyn qalyptastyrý máseleleri bar.
Til máselesi ózekti bolyp qala beredi. «Biz osy asa shetin máselege kelgende syrtqy-ishki faktorlardy eskere otyryp, strategııalyq ustamdylyq jáne toleranttyq tanytýymyz qajet», degen Memleket basshysynyń pikirimen kelisemiz.
Prezıdenttiń aldymyzǵa qoıyp otyrǵan mindetterin otandastarymyz oryndaı alady dep senemin. Birliktiń arqasynda biz Ádil Qazaqstandy – múmkindikteri teń qýatty memleketti qura alamyz.
Aıda BALAEVA,
Mádenıet jáne aqparat mınıstri